(1) Haa-Mim, su allah i mataw kanu ma’ana nin.
(2) Initulun su kitab abpun sa Allah a mapulu a mataw.
(3) Bangampun su dusa, padtalima sa tawbat, a mapasang i siksa nin tigwan sa limu,dala kadnan nya tabya na sekanin, andu lu salakanin i kaulyan.
(4) Dala abpalawa sa ayat nu Allah, nya tabya na su mga supak (kafeer) na dakabu mapasimpang kanu kapan-daludaya nilan kanu dalpa.
(5) Nawna pan sakanilan a napanmdalbut su taw nu nuh, andu su mimbalang-balang pan i nawli sakanilan andu pagkyugan na uman isa i bunun nin su nabi nin, andu mibpalawa silan sa batil, ka andu nilan makababa su haqq, na bininasa ku silan na panun su siksa ku sa gay a mawli?
(6) Maytu ba i kadadsang nu kadtalu nu kadnan nengka lu kanu mga taw a mga kafeer, silan ba a tigwan sa naraka.
(7) (Su mga malaa-ikat) a pabpusan sa arash andu su mga malaa-ikat sa ambala-bala a bamadtasbih sa puji nilan sa kadnan nilan, andu bangimbanal silan andu ibangani nilan sa ampun su mga bamaginugut, nay a nilan kadtalu na , kadnan nami mawlad gayd i limu nengka andu kataw nengka, na ampun ka su midtawbat andu tinuntul nin su agama nengka, andu landing ka silan kanu naraka jahannam.
(8) Kadnan nami paludap ka silan sa surga a pibpasad nengka sakanilan, andu su mapya kanu mga lukas nilan, kaluma nilan, mawli a taw nilan, ka seka i mapulu a mataw sa andadayta.
(9) Andu dalandingi ka silan kanu mga mawag, ka su dinalandingan nengka kanu antu a gay na inikalimu nengka andu badtugan a masla.
(10) Saben-sabenal su mga kafeer na padtawagan silan sa muna pan sa lipungat nu Allah salkanu kanu lipungat kanu ginawa nu, baganggatan kanu sa kapangimbanal na pagkafeer kanu.
(11) Nya nilan madtalu na, kadnan nami inimatayan kami nengka sa nakadwa,andu inuyag kami nengka sa nakadwa, na nangimbanal kami den kanu kadusan nami, nan gin nya aden bun lalan a makambalingan kami (sa dunya).
(12) Nya adtalun sakanilan, sekanu na amayka pakaisa-isan su Allah na agkafeer kanu, amayka sakutun su Allah na mangimbanal kanu.
(13) Sekanin (Allah) ipabpagilay nin salakanu su mga ayatan nin, andu papadtlunan nin abpun sa langit I ridzki sabap kanu ulan.
(14) Simban nu su Allah sa ikhlas salakanin su agama sa apya dili kaswatan nu mga kafeer.
(15) Mapulu i pangkatan nin, tigwan sa arsh, padsugun nin su jibrel abpun kanu sugwan nin kanu magkahanda nin lu kanu ulipan, ka andu nin makapanggigilak su gay a kadtalabuka.
(16) Su gay a mapayag silan (hadapan nu Allah) sa dala makapagana nilan sa Allah apya paydu, n antayn tigwan sa kadatu sa (namba) agay, kanu Allah a isa nin bu a pakapagas.
(17) Su gay a balasan su uman isa kanu galbak nin, na dala kadtalimbuta saguna a gay, su Allah na mangagan i kakukum nin.
(18) Andu pakagilkika silan kanu gay a mawli, su mga atay kanu nin na mamusug sa bakalngan nin sa dili silan makadtalu dala kanu mga dupang i malimu andu tumabang a kaunutan.
(19) Katawan nu Aallah su kadupang nu pipilak andu su dalam nu pusung.
(20) Andu su Allah i kumukum sa haqq, su padsimba sa salakaw sa Allah na dala kakukum nin sa apya paydu,saben-sabenal su Allah na pakakinag a pakaylay.
(21) Antu b aka balalakaw silan kanu dalpa, ka maylay nilan u panun i nanggula nu mga taw a nawna sakanilan sa nya pan muna i kabagal nin andu nakambwat kanu dalpa sa mga tanda, bininasa nu Allah silan sabap kanu kadusan nilan, na dala nakabpagalat kanu kyug nu Allah a kabinasa nilan.
(22) Namba na pakawma bun sakanilan su mga sinugu sakanilan sa nakait sa mga mapayag, na pigkafiran nilan , na bininasa nu Allah silan ka sekanin (Allah) i mabagal a mapasang i siksa nin.
(23) Andu saben-sabenal a sinugu nami su Musa kanu mga ayatan nami andu mga tindag a mapayag.
(24) Lu kanu fir’awn andu su haman andu su Qarun, nya nilan pidtalu, na sihir a malbut (su Musa)
(25) Guna makawma saknilan su bantang na nya pidtalu (Fir’awn) imatayan i wata mama a manot sakanilan (Musa) nya bu isama na babay dala kanu alyugan nu mga kafeer nya tabya na katadingan.
(26) Andu pidtalu ni fir’awn sa padtaday aku nu ka bunun ku su Musa ka manganic sa kadnan nin, ka kagilkan aku sa sambyan nin su agama nu atawka ka nya nin ipayag sa dalpa na makagkayd.
(27) Andu pidtalu nu Musa na , lumindung aku sa kadnan ku a kadnan nu bun kanu taw a pamamasla a dili bangimbanal sa gay a mawli.
(28) Nya pidtalu nu isa a mama bamagiugut a kadakal nu fir’awn a inipagana nin sui man na andukan ka pambunun nu i mama a yanin bu padtalun na kadnan ku su Allah a nakait pan selakanu sa mapayag (a tanda) anpun kanu kadnan nu, amayka malbut sekanin na lakanin bun i kalbut nin, amayka banal sekanin na masugat kanu na sabad kanu pasad nin selaknu, ka su Allah na dinin tutulun su baminasa a malbut.
(29) Hee sekanu a mga pagali ku, lakanu i kadatu a mapayag saguna a gay sya sa lupa, antayn makatabang salakitanu amayka makawma su tyuba nu Allah salakitanu, nya pidtalu nu fir’awn dala ungaya ku selaknu, nya tabya ungaya ku bun sa ginawa ku, andu nya ku ipadtutulu salkanu na lalan a mapya a makagkapya.
(30) Andu midtalu su isa kanu bamaginugut sa mga pagali ku,kagilkan aku masugat kanu na mana sa nakasugat kanu madakal a nawna.
(31) Mana su taw ni Nuh. Andu si Aa’d andu su thamud, andu su nawli sakanilan, andu su Allah na dili dumupang kanu mga ulipan.
(32) Andu Hee sekanu a mga taw ku, ikagilak ku salkanu su gay a kadtatawaga.
(33) Su gay a kab-papalaguyan nu sa dala den selkanu siksa nu Allah, andu su tanding nu Allah na dala makatutulu lu.
(34) Andu saben-sabenal a nakawma bun salkanu su yusuf a nawna sa mapayag I antayn na di kanu bun gapinda sa kapandwa-dwa kanu nakawma salakanu taman sa guna matay na yanu pidtalu na di den mapambwat su Allah sa sinugu, namba I tadingan nu Allah su taw a nakasagad i kawag a palangayan nin na pandwadwa.
(35) Su mga taw a pabpalawa sa kanu mga ayatan nu Allah sa dala tindag nin a nakawma sakanilan na masla a kadusan lu sa Allah andu lu kanu mga bamaginugut, namb ipadtutupan nu Allah i pusung nu pamamasla a bamagas.
(36) Andu pidtalu nu fir’awn, hee hamaan ambalay aku sa maligay a masla a mapulu, ka basi ku masampay i mga panikan.
(37) Panikan ibagangay sa langit, ka andu ku maylay i kadnan ni Musa ka bangantapan ku a pandalbut, namba i pakalilini kanu fir’awn sa kanu kawagan nu galbak nin, andu napelen kanu lalan a pakatidtu,a ndu dala alyugan nu fir’awn a dikana pakabinsa lun.
(38) Andu pidtalu nu sakataw a bamginugut i , hee sekanu a kadakal ku unuti a kunu ka tutulun ku sekanu sa lalan a pakatidtu.
(39) Hee sekanu a mga pagali ku, saben-sabenal sa kabpaguyag sa dunya na pagkakalinyan bu, su akhirat i dalpa a dayun sa dayun.
(40) Su taw anggalabak sa mawag na dili balasan u dikana pagidsan nin bun, andu su taw anggalabak sa mapya babay-mama na silan ba i makaludap sa surge sa paridzkyan silan lu sa dalam na surge sa di den bagitungan.
(41) Andu Hee sekanu a mga pagali ku baganggatan ku sekanu sa kalapas (siksa) na baganggatan aku nu sa kanaraka.
(42) Bagenggatan aku nu sa agkafeer aku sa Allah andu sakatun ku ku sekanin na dala salaki i kataw na saki na baganggatan ku sekanu kanu mapulu a bangampun.
(43) Dili abpalis na baganggatan nu banan salaki na dala katagan nin sya sa dunya andu lu sa akhirat, andu lu tanu bun tanan pakambalingan sa Allah,andu su mga darwaka na silan tigwan sa naraka.
(44) Katadaman nu bun i padtalun ku ba nya salkanu, na lu aku den kumamping sa Allah, ka su Allah i pakaylay kanu mga ulipan nin.
(45) Na dinalandingan nu Allah kanu mawag a alyugan, andu nakadadsang kanu kadakal nu fir’awn su mawag a siksa.
(46) Su naraka i pabpagyay sakanilan sa mapita-malulam, andu su gay a mawli na paludapan silan a kadakal nu fir’awn sa mapasang a siksa.
(47) Andu abpapalawa silan lu sa naraka, nya adtalun nu mga lubay kanu mimamasla na , sekami na bagunut kami bu salakanu, na ngintu saguna na kadtabangan kami nu sa kanu siksa sa naraka?
(48) Nya madtalu nu mimamasla (naunutan) na langun tanu na sya tanu den sa naraka , ka su Allah na saben-sabenal a kinukum nin su ulipan.
(49) 49 . Andu adtalun nilan kanu padtamang sa naraka i panganin nu pan sa kadnan u pagkagang kami nin pan sa siksa sa apya sagay bu.
(50) Adtalun sakanila i, dala makawma salakanu i mga sinugu a nakapananggit sa mga mapayag, nya nilan madtalu na nakawma salakmi,nya madtalu nu padtamang na tawag nu silan, na dala dua nilan (kafeer) a dikana katadingan.
(51) Dili abpalis i kadtabang nami kanu mga sinugu nami andu su mga bamaginugut sya sa dunya andu lu sa gay a mawli kanu hadapan nu mga saksi.
(52) Gay a dili makangguna kanu kafeer su dawa nilan, sakanilan su mulka andu kawagan nu kandalpan.
(53) Andu saben-sabenal a ininggay nami kanu musa su tutulu, andu pinawarisan nami kanu tupu nu Israel su kitab.
(54) A tutulu andu indawan kanu aden mga ungangan nin.
(55) Adsabar ka (Muhammad) ka su pasad nu kadnan nengka na banal, pa ampun ka kanu kadusan nengka, andu tasbih ka sa pugi nengka kanu kadnan nengka sa mapita-malulam.
(56) Su pabpalawa kanu mga ayatan nu Allah a dala tindag nin a nakawma salkanin na nakadalam sa pusung nilan i kamamasla a dili nilan bun masampay, lindung ka sa Allah ka sekanin i pakikinag a pakaylay.
(57) Kinabaluy sa mga langit andu lupa na nya malagan sa kinabaluy sa manusya, ugayd na nya madakal sa manusya na dili mataw.
(58) Andu dili makapagidsan su pisak andu su pakaylay, andu su mga bamaginugut a minggalabak sa mga mapya andu su taw a malat, paydu i katadaman nu indawan.
(59) Su gay a mawli na dili abpalis na makawma, ugayd na nya madakal kanu mga taw na dili bangimbanal.
(60) Andu pidtalu nu kadnan nu i, pangani kanu salaki ka anggan ku sekanu, su pamamasla sa andu aku nin dili masimban na dili abpalis i kaludap nilan sa naraka a lusak.
(61) Su Allah i minaluy kanu magabi a ibangintalanan nu, andu su malmag a ibagilay nu, si Allah tigwan sa limu kanu manusya,ugayd na nya madakal kanu mga taw a dili makadsukur.
(62) Antu ba su Allah a kadnan nu a minaluy kanu angaga-isa, dala kadnan nya tabya na su Allah, na panun i kapapandalbut nu?
(63) Mamba i kandalbut nu mga taw a padsupak kanu mga ayatan nu Allah.
(64) Su Allah i minaluy salakanu kanu lupa a kadtakanan nu, andu su langit a naka-atap andu pinabpalas kanu nin, pinagkapya nin i palas nu inanggan kanu nin sa mapya a ridzki, na antu bas u Allah a kadnan nu, mahasutti su Allah a kadnan nu dunya.
(65) Sekanin (Allah) i bibyag, dala kadnan a salakaw salakanin, pangani kanu salkanin sa ikhlas salakanin su agama,pugin nu su Allah ka sekanin i kadnan nu dunya.
(66) Adtalu ka (Muhammad) sakanilan i sinapalan aku sa simbang ku i padsimban nu a salakaw sa Allah sa ulyan na kinawma salaki nu mga mapayag abpun sa kadnan ku, andu sinugu aku nin sa sumangkup aku kanu kadnan nu dunya.
(67) Sekanin(Allah) i minaluy salkanu abpun sa lupa, antupan i mani nantupan a lugu, mawli na palyun kanu den sa wata, mawli na masampay nu su bagalu, mawli na migkatwa kanu, aden bun matay sa dala agkatwa, andu masampay nu su ajal nu a napasadan, ka andu kanu agkawngangan.
(68) Sekanin (Allah) i baguyag andu bangimatay, amayka aden kahanda nin na nya nin bu adtalun na pangadan ka na maaden.
(69) Dala nengka maylay su pabpalawa kanu ayatana nu Allah, na panun i kapadsambay nu akal nilan?
(70) Antu ba su papandalbut kanu kitab, andu su inisugu nami kanu mga sinugu nami, na dili abpalis na katawan nilan bu.
(71) Su lantay-lantay na kanu tangu nilan, andu su mga sangkali a apuy i inipawik sakanilan.
(72) Aden antu na guyudan silan kanu mayaw andu lu kanu pagkalag sa apuy.
(73) Mawli na adtalun sa kanilan i, andaw su ipadsakutu nu a padsimban nu.
(74) Padsimban nu a salakaw sa Allah, nya nilan madtalu na natadin salakami, andu dala nami silan masimba apya paydu, mamba i kapadtadin nu Allah kanu mga kafeer a dili bangimbanal.
(75) (Adtalun sakanilan) i nan den ba su ipagkalilinyan nu lu sa dunya sa dala kawagib nin,andu kagalaw kanu sa tapik su kamamasla na ginawa.
(76) Ludap kanu bungawan sa naraka jahannam sa dili kanu makalyu, na ngen den i kawag nin a kandalpan i kanu mga mimamasla.
(77) Adsabar ka (Muhammad) ka su pasad nu kadnan nengka na banal, ipaylay nami selka su kaped a siksa nilan, atawka kapatay nengka bu i kaylay nengka lun, ka sya bun tanan silan makambalingan salakami.
(78) Andu saben-sabenal a sinugu nami su mga sinugu a nawna salka, aden bun kanilan i pinanudtul nami selka, aden bun dala nami pandtula, dala sinugu i makapamwat sa ayat nya tabya na kahanda nu Allah, na amayka mawma su kahanda nin (Allah) na kumukum sa bantang, na luden ba nalugi su baatil i galbak nin.
(79) Su Allah i minaluy salakanu kanu mga binatang a kapagadan nu, su kapad andu pagkan nu bun su ped.
(80) Andu aden pan katagan nin salakanu, andu masampay nu su kahanda nu kanu lalab nu, andu pananggitan kanu sya sa kapuluwan andu sya sa lagat.
(81) Andu ipabpagilay nin salkanu su tanda nin, na dili nu magaga mungkir.
(82) Ngentu ka dili silan lumakaw kanu lupa ka andu nilan maylay i nawli a tyuba kanu mga taw a nawna sakanilan? A silan pan i madakal i bilangan nin andu silan pan i mabagal andu mga tanda nilan sya sa lupa, na dala makangguna sakanilan su mga galabak nilan.
(83) Guna makawma sakanilan su mga sinugu a napananggit sa mga mapayag na nagalaw silan kanu ilmu nilan, dikana ka ankadadsang sakanilan su siksa a lalaw nu kab-pagungat nilan.
(84) Guna nilan maylay su tyuba nami nya nilan pidtalu na, nangimbanal kami sa Allah a isa bu, andu sinangka nami den su ipadsakutu nami.
(85) Na dala makangguna sakanilan sui man nilan sa kinaylay nilan kanu siksa, su lalan nu Allah na nawna den kanu mga ulipan, andu nalugi su mga kafeer.