52 - At-Tur ()

|

(1) Saki (Allah) idsapa ku su palaw sa tur.

(2) Andu su kitab a nakakulis.

(3) Lu kanu sinulatan lun a upis.

(4) Andu su baital ma’mur.

(5) Andu su langit a mapulu.

(6) Andu su lagat a napanu.

(7) Saben-sabenal su siksa nu kadnan nengka na mawma.

(8) Dala makatulak lun kanu siksa.

(9) Kanu gay adtalinggi su langit a magubal.

(10) Andu makabayug manem su mga palaw.

(11) Su bogan sa naraka i kadtakanan nu papandalbut (sa gay a mawli).

(12) Silan a mga taw na nya nilan bamikalan su dala katagan nin sa kinandalamat.

(13) Su gay a takawan silan sumumag kanu naraka sa takaw a mapasang.

(14) (adtalun sakanilan) i nyaba su naraka a dili nu bangimbanalan sa lu kanu pan sa dunya.

(15) Ngin nyaba sihir atawka di kanu pakaylay.

(16) Ludap kanu sa naraka, adsabar kanu atawka di kanu adsabar na magidsan bun, kayanu bun balas na su galabakan nu sa dunya.

(17) Saben-sabenal su magilak (sa Allah) na lu silan makabpawang sa mapya gayd a surga andu kagkalilini.

(18) Kaalinyan nilan su ininggay nu kadnan nu kadnan nilan sakanilan, andu dalindingan nu Allah kanu naraka jaheem.

(19) (Andu adtalun sakanilan) i kan kanu andu inum kanu sa mapya, sabap kanu galabak nun a mapya sa dunya.

(20) Padsandang silan kanu mga kantil a mindadalapisa i tilamin, andu pinag kaluma nami sa bidadari.

(21) Andu su mga bamaginugut andu pinatalukun nami sakanilan (pinatudug) su muli a taw nilan sabap kanu iman, na pinagos nami sakanilan su muli a taw nilan a dala inikulang nami kanu balas nu uman-isa sakanilan, langun na galabak nu uman-isa na natuganul.

(22) Andu inumanan nami pan silan sa ungan na kayu andu sapu sa andaw i kalilinyan nilan.

(23) Pan-dwalay silan sa basu a sutti, andu dala maladsik nin.

(24) Andu pambalibitan silan nu mga wata a mama sa mana den silan muntya a pagkandap-kandap.

(25) Andu adsasangula silan sa mamangidsaya.

(26) Nya nilan kadtalu na malimu kami gayd sa kadakal nami.

(27) Inikalimu kami nu Allah ka tinimu kami nin, linipas kami nin kanu siksa a mayaw.

(28) Saben-sabenal a sekami (lu kami pan sa dunya) na padsangulan nami su Allah, ka sekanin (Allah) i mapya a malimu.

(29) Pamgimdaw ka (Muhammad) ka dikana ka padtumpan andu dikana ka bunag kanu limu nu kadnan nengka salaka a nawna.

(30) Atawka padtalun nilan i pababayuk, angapan den i kapatay nin.

(31) Adtalu ka sakanilan i pagangap kanu ka bangapan kubun i kapakayd nu Allah selakanu.

(32) Padsugun silan nu itungan nuilan a maladsik andu silan a mga taw a nakasagad i galabak nin kadtalu nin sa kumpasan.

(33) Pidtalu nilan pan i padtatabu (si Muhammad) kana ka, mga taw a dala sabut nin.

(34) Pambwatan nilan nilan i pagidsan (a Qur’an) amayka banal silan.

(35) Ngintu binaluy silan sa dala nabpunan nin atawla silan i minaluy?

(36) Ngintu binaluy nilan su mga langit andu su lupa ?dikana, ka dili gatagu sa ginawa nilan su gay a mawli.

(37) Ngintu lu kanilan su nabatadan nu tyakap nu Allah atawka (silan) ipagkyug-kyug.

(38) Ngintu aden panikan nilan lu sa langit? Na pambwatan nilan su pakikinag sakanilan sa aden (madtapik nin) a tindag a mapayag.

(39) Atawka nya bu kanu kadnan na su wata a mga babay, lakanu i mga mama ?

(40) Atawka pagkwa ka sa bayad na kalagan silan pambayad?

(41) Atawka lu kanilan su gayb na silan i banulat?

(42) Atawa ka ebpamameg­ kiyugan nilan I katipuwan, na su namamegkakapil na silan su egkangatipu.

(43) Atawka aden pan kadnan nilan a salakaw sa Allah? Mahasutti su Allah kanu kapadsakutu nilan.

(44) Andu amayka makaylay silan abpun sa langit a kawlug a malibutang na nya nya nilan kadtalu na gabun a makapal.

(45) Pasagadi ka Muhammad ka mawma nilan bun i gay nilan lu ba silan mamamatay a sangat i kasakit nin.

(46) Gay a dala katagan nin sakanilan su pandapat nilan a malat,a ndu dala den katabang sakanilan.

(47) Andu saben-sabenal na aden kanu mga dupang i siksa a salakaw pan kanu nalabit ugayd na nya madakal na dili mataw.

(48) Endo edsabar ka kano hukuman no Allah atulan no Allah sa ipenggogoli nin so Siksa nin kano mga kafir daka enggilek endo daka mangandam ka saben-sabenal sa lekami na kailay nami seka endo pebparihalan nami seka Tasbeh ka kano Allah endo Pugi ka kano Allah sa uman ka teminding sa mga Sambayang taman kano ulyanan no mga sambayang.

(49) Andu ped kanu magabi na tasbih ka, andu su kasadap nu bitun.