(1) 1- Ko innde Alla puɗɗorat-mi janngude Kur'aana o, mi wallinoo Mo mi barkinora e jantaade innde Makko. Basmala o na renndini inɗe Alla tati he inɗe Makko moƴƴe ɗe, ɗeen ngoni: 1- "Alla" woni: deweteeɗo e goonga, ko ndee ɓuri heeraade e inɗe Alla Toowɗo o, hay gooto innirtaake nde so wonaa Kanko Mbo senaande woodani. 2- "Arrahmaanu" woni: jooma yurmeende yaajnde. Kanko tigi woni Arrahmaanu. 3- "Arrahiimu": jooma yurmeende jokkunde yottiinde. O yurmoo mbo O welaa e tagoore Makko, goonɗinɓe e jeyaaɓe Makko na tawee heen.
(2) Denndaangal nooneeji jettirɗi e sifaaji teddungal e timmal ko Kanko tan woodani alanaa tanaa Makko; sabu ko Kanko woni Joomiraawo tagɗo Pewjanoowo kala huunde. "aalamiin" keewal "aalam" woni kala ko wonaa Alla Toowɗo o.
(3) 3- Yettude Alla toowɗo o caggal yettude Mo e aaye jawtuɗo o.
(4) 4- Mawninde Alla Toowɗo o sabu wonde Ko Joma kala ko woni e ñalngu darnga, tawde fittaandu alaa ko joganii goɗɗo. te "ñalngu njoɓdi": ñalngu yoɓeede e hiiseede.
(5) 5- Ko Aan tan min keerinani dewe e ɗoftaare, min ndenndintaa Ma e tanaa Maaɗa, ko Aan tan min mballintoo e kala geɗe amen, moƴƴere fof woni ko e junngo Maa, alaa balloowo so wonaa Aan.
(6) 6- Tinndin min laawol pooccingol, ndewnaa min e maggol, tabitinaa min heen, Ɓeydanaa min peewal. "Laawol pooccingol" woni laawol laaɓtungol ngol ooñaaki, ngool woni Lislaam mbo Alla neliri Muhammad- jam e kisal Alla yo won e makko-
(7) 7- Laawol ɓeen jeyaaɓe Maa ɓe neeminir-ɗaa peewal; wano Annabaaɓe ɓe, e gooŋɗuɓe ɓe, e sahodinɓe ɓe, e moƴƴuɓe ɓe, kamɓe ngoni wondiiɓe moƴƴuɓe, wonaa laawol tikkanaaɓe annduɓe goonga te ɓe ndewaani ɗum, wano yahudu en, wonaa kadi laawol majjiraaɓe goonga mbo ɓe donki yiitude sabu yeebagol maɓɓe ɗaɓɓitde goonga haa yiita mo wano nasaara en.