49 - Al-Hujuraat ()

|

(1) Ko onon yo ɓen gomɗimɓe Allah, ɓe jokki sari'a Makko on, wata on aditor yeeso Allah e Nulaaɗo Makko, konngol maa kuugal. Huliron kadi Allah, ñemtinirgol yamaruyeeji Makko ɗin e woɗɗitagol haɗaaɗi Makko ɗin. Pellet, Allah ko Nanoowo haala mon, Annduɗo golle mon. Huunde e mun laawotaako Mo. Ma O yoɓitiroy on ɗi.

(2) Ko onon yo ɓen gomɗimɓe Allah, ɓe jokki sari'a Makko on, ne'anee Nulaaɗo Makko on, hara on townaali sowtooji mon ɗin e hoore sowto Annabaajo on (yo o his) tuma yewtoton mo, wata on ewnor kadi innde makko nden, wano yoga mon ewnorta yoga; noddiree mo newaare wiide Annabiijo e Nulaaɗo; fii wata golle mon ɗen bonir sabu ɗum, hara on so'aa-anndude ɗum.

(3) Pellet, ɓen joltinay ɓe sowtooji mun ɗin ka Nulaaɗo Allah on (yo o his), ko ɓen woni ɓe Allah jariboori ɓerɗe mun ɗen hulugol Mo, O laɓɓiniri ɗe ɗum. Hino woodani ɓe haforannede junuubi ɗi ɓe nanngitirtaake, e njoɓdi mawndi Ñalnde Darngal, wonnde Allah naadoyay ɓe Aljanna.

(4) Pellet, ɓen yimɓe ladde ɓe no noddire an Nulaaɗo ka ɓaawo cuuɗi rewɓe maa ɓen, ko ɓuri ɗuuɗude e maɓɓe, wanaa haqqilooɓe.

(5) Sinno ɓee noddiraynooɓe ma an Nulaaɗo, ka ɓaawo cuuɗi rewɓe maa ɓen muññino haa yawtaa tawaa ɓe, ontuma ɓe yewtire sowtooji joltuɗi, ko ɗum ɓuraynoo moƴƴannde ɓe dii noddirgol maa ɓaawo, tawde ko tintodugol e maa ngol wonndi e teddungal. Allah non ko Haforoowo junuubi kala tuubuɗo e maɓɓe e wanaa kamɓe sabu majjeede maɓɓe, Hinnotooɗo ɓe kadi.

(6) Ko onon yo ɓe gomɗimɓe Allah ɓe golliri sari'a Makko on, si faasiqiijo ardanii on e kabaaru fii yimɓe, haray tefee fii mun, haray on hawjiraali goongingol mo, fii wata on heɓor e yimɓe, sau majjeede huunde nden, waɗtiniron kon ko heɓiɗon e maɓɓe ɗon, ninsuɓe, tuma fenaande kumpital ngal laaɓani on.

(7) Anndee wonnde Nulaaɗo Allah on hino hakkunde mon, onon muumini'en, wahayu on no jippaade e makko, rentoɗon e fennugol, sakko wahayu jippoo e makko humpitugol mo ngol fennugol mo, e hino le himo anndi ko moƴƴanta on. Si o tewtino on e ko holloton mo, on yanayno e tampere nde o faalananooka on. Kono Allah kan, e ɓural Makko ngal, O yiɗini on gomɗinal, O cuɗini ngal e ɓerɗe mon haa gomɗinɗon; O añini on keeferaaku, e yaltugol e ɗoftaare Makko, e yeddugol Mo. Ko ɓen siforaaɓe ɗin sifaaji ɗon, woni jokkuɓe laawol peewal ngol.

(8) Ko heɓu ɗon kon e cuɗinaneede gomɗinal ka ɓerɗe mon, e añineede bone on, fow ko ɓural immorde ka Allah, ngal O moƴƴorii e mon, e neema kadi mo O neeminiri on. Allah ko annduɗo jeyaaɓe Makko yettooɓe Mo ɓen, O fewna ɓe, Ñeeñuɗo kadi, tawde O waɗay huunde kala ka haani ɗon.

(9) Si feddeeji ɗiɗi e gomɗimɓe ɓen haɓii, haray ko yo on moƴƴintinir hakkunde maɓɓe, onon gomɗimɓe ɓen, noddugol ñaawirgol sari'a Allah on e kon ko waddi ɓe. Si fedde goo e maɓɓe salike nde jaggitii, haɓee nden jaggitunde ɗon, haa nde ruttoo e ñaawoore Allah nden. Si nde ruttike e ɗum, ko moƴƴintinirgol hakkunde maɓɓe, nunɗal e laaɓal. Nunɗee ka ñaawugol hakkunde maɓɓe, tawde pellet, Allah no yiɗi nunɗooɓe e ñaawugol maɓɓe ngol.

(10) Anndee gomɗimɓe ɓen ko jeyduɓe ka lislaamu. Jeydugol non e lislaamu, hino lamndii moƴƴingol hakkunde mon, onon gomɗimɓe pooɗondirayɓe ɓen. Huliree Allah ɗoftagol yamaruyeeji Makko, woɗɗitoo haɗaaɗi Makko, belajo, on yurminte.

(11) Ko onon yo ɓen gomɗimɓe Allah, ɓe golliri sari'a Makko on ! Wata yimɓe goo e mon jalkitu woɗɓe dey: hino gasa hara ɓen jalkitaaɓe hino ɓuri moƴƴude e mun en ka Allah. Wata rewɓe kadi jalkitu rewɓe : hino gasa ka ɓen jalkitaaɓe ɓurata ɓe moƴƴude ka Allah. Wata on aybin musiɗɓe mon, hiɓe wa'i wa mon. Wata on bugondir kadi jammooje ɗe on yiɗaa, wano yimɓe Madiina anndiranoo ando seenagol Nulaaɗo Allah on (yo o his). Kala e mo'on waɗuɗo ɗum, ko yaltuɗo e ɗoftaare. Sifa ngun jikku ɗon non bonii baawo goɗingol. Kala mo tuubaali e ɗin geddi, ko ɓen woni tooñirɓe ko'e-mun, unagol e halkaare, sabu ɗin geddi maɓɓe.

(12) Ko onon yo ɓen gomɗimɓe Allah ɓe golliri sari'a Makko on, waɗɗitee e ko ɗuuɗi e sikke. Pellet, yoga e sikke ko bakkaatu ; wano sikkugol goɗɗo bone, hara le ko moƴƴere feeñi e makko. Wata on wiɗo gomɗimɓe ɓen ɓaawo maaɓe, wata yoga mon kadi wowlu yoga ko mettata oya ; sabu ɗum no wa'i wa ñaamugol teewu musiɗɗo mun maay- ɗo. Hara non goɗɗo e mo'on yiɗay ñaamugol teewu musiɗɗo mun maayɗo? Awa añiree ño'ugol mo ngol wano non. Huliron Allah ɗoftagol yamiraaɗi Makko, woɗɗitoo haɗaaɗi Makko. Pellet, Allah ko Jaɓanoowo kala tuubuɗo e jeyaaɓe Makko ɓen, Hinnotooɗo ɓe.

(13) Ko non yo yimɓe ! Men tagirii one gorel gootel, on woni baaba mon Aadama, e deyel gootel, on woni neene mon Hawaa; dammbe mon ko gootum, wata woɗɓe e mon wasooro dammbe e hoore woɗɓe. Men waɗi on kadi leƴƴi ɗuuɗuɗi e gori saakitiiɗi heen fow, fii yo on anndindir hakkunde mon, wanaa ko mantoree. Ko senndi on, ko gomɗal ngal, ko ɗum waɗi si O daali: "Pellet, ɓurɓe teddude e mon ɓen ka Allah, ko ɓurɓe gomɗude ɓen e mon". Awa Allah ko Annduɗo fiyakuuji mon ɗin, Humpitiiɗo fii ɗuytaare maa ɓeydaare ko woni e mon. Huunde e mun suuɗaaki Mo.

(14) Yoga e yimɓe ladde ɓen nde hewtunoo ka Annabiijo on ( yo o his) ɓe wi'i: Men gomɗinii Allah e Nulaaɗo Makko on. Maakan ɓee, an Nulaaɗo: On gomɗinaali taho. Wi'ee kan : Men silmii, men jebbilike. Gomɗinal ngal naataali taho ka ɓerɗe mon, hino hasii non ka ngal naatoya. Si onon ɓee yimɓe laddeeɓe, on ɗoftike Allah e Nulaaɗo Makko on ka gomɗinal e ka golle moƴƴe, e ka woɗɗitagol harminaaɗi ɗin, Allah ɗuytantaa on huunde e mbarjaari golle mon ɗen. Pellet, Allah ko Haforanoowo kala tuubuɗo e jeyaaɓe Makko ɓen, Hinnotooɗo ɓe.

(15) Gomɗimɓe tigi ɓen, ko ɓen gomɗimɓe Allah e Nulaaɗo Makko on, refti ɓe jillaani sikke e gomɗinal maɓɓe ngal, ɓe tiiɗnori kadi jawle e pittaali maɓɓe ɗin fii laawol Allah ngol, hara ɓe wuddiraali huunde e majji. Ɓen siforaaɓe ɗin sifaaji, ko ɓen woni goonguɓe e gomɗinal mun.

(16) An Nulaaɗo, maakan ɓee yimɓe ladde : kere on anndinay Allah diina mon kan? Hara non Allah no anndi kala woni ka kammuuli e ka leydi. Allah ko Annduɗo kala huunde. Hay huunde suuɗaaki Mo. O hatonjinaa e ko humpitoton Mo fii diina mon.

(17) Ɓee yimɓe ladde no wajite an Nulaaɗo, fii ɓe silmii. Maakan ɓe : wata on wajitam naatuugol mon e diina Allah kan, sabu ɗum ko onon nafata. Si ko woni, ko Allah wajitata on fii O hawrindinii on e gomɗingol Mo, si wonii ko on goonguɓe e nodditorgol mon naatugol e diina kan.

(18) Pellet, Allah no anndi wirniiɗi kammuuli ɗin e leydi ndin. Huunde e mun suuɗaaki Mo. Allah ko Reenuɗo ko golloton kon. Huunde e golle mon ɗen suuɗaaki Mo. O yoɓitoyay on ko boni e ko moƴƴi e majje.