(1) Kala ko woni tagu ko woni ka kammuuji e ka leydi hino laɓɓinnde Allah e kala ustaare ko yaadah e Makko. Ko Kanko woni Laamɗo hertorɗo laamu, Laaɓuɗo e kala ustaaree, Fooluɗo Mo gooto foolataa, Ñeeñuɗo e tagu Mun e sari'a Mun e koddoruyee Mun.
(2) Ko kanko nuli e Aarabeeɓe ɓe anndaano binndol e jannde ɓen, Nulaaɗo jeyaaɗo e maɓɓe, himo ɓe janngana ɓe Aayeeje ɗe Allah jippini e Makko, o laɓbina ɓe e keeferaaku e jikkuuji bonɗi, o anndina ɓe Alqur'aana e Sunnah, hari non ɓen ko ɓe majjunooɓe goonga ado o Nuleede e maɓɓe, tawde ko sanamu ɓe rewaynoo, ɓe rufa ƴiiƴe, ɓe taƴa enɗam.
(3) O Nuli kadi Nulaaɗo on e Aarabeeɓe goo e ko wanaa ɓen, ɓen araali taho, hiɓe saatii non arde. Ko Kanko woni Fooluɗo Mo gooto foolataa, Ñeeñuɗo e tagu Mun e sari'a Mun e hoddira Mun.
(4) Ko jantaa koo e Nulugol Nulaaɗo on faade e Aarabeeɓe ɓen e ko wanaa kamɓe, ko ɓural Allah ngal O okkata ngal mo O muuyani. Allah ko Jom moƴƴere mawnunde. Hino jeyaa e moƴƴere Makko mawnde nden, nulugol Nulaaɗo ɗee mofte on e yimɓe ɓen fow.
(5) Misal Alyahuuda fawanooɓe gollitirgol ko woni e Tawreeta kon ɓe salii, no wa'i wano mbabba ronndii mba defte tedduɗe, hara mba anndaa ko mba ronndinaa : ko defte kaa wanaa? Sugu ngal misal yimɓe fennuɓe Aayeeje Allah ɗen bonii. Allah fewnataa yimɓe tooñooɓe ɓen e peewal.
(6) An Nulaaɗo, maaku: ko onon yo heddiiɓe e Alyahuudaaku ɓaawo wayleede ɗum ! Si on aaƴike wonnde ko on yiɗaaɓe Allah heertiniraaɓe ɗum ko wanaa yimɓe hedditiiɓe ɓen, haray yelee maayde fii no O yaccinirana on ko O heertinani on kon e teddungal ngal aaƴiɗon, si tawii ko on goonguɓe e kon ko nodditorɗon.
(7) Ɓe yelotaako maayde nden muk, wurin ko heddagol aduna ɓe yelotoo, sabu ko keeferaaku e geddi e tooñi ko ɓe huuwi kon, e waylugol wattita Tawreeta. Allah ko annduɗo tooñooɓe ɓen. Hunde e kuuɗe maɓɓe ɗen wirnaaki Mo. Ma O yoɓitoyɓe ɗum.
(8) An Nulaaɗo, maakan ɓee Alyahuudaaɓe : Anndee ndee maayde nde dogoton, ko hawraynde e mon neeɓa maa yaawa feere mun alaa. Refti rutteɗon ka Allah Ñalnde Darngal, On annduɗo ko wirnii e ko feeñi, Mo huunde e majji suuɗaaki Mo, O yeetitoo on ko gollaynoɗon kon aduna. O yoɓita on ɗum.
(9) Ko onon yo gomɗimɓe Allah, ɓe gollitiri sari'a Makko on ! Si noddinoowo on noddinanii julde nden ñalnde Juma, ɓaawo Almaami on ƴawde ka ganngunal, haray yaccee e juulirɗe ɗen fii tawegol kutuba on e julde nden, acciton ngeñngu ngun hara ngu sokoliraali on e dewal ngal. Ko on yamaruyee ɓuri moƴƴannde on, si tawno hiɗon anndunoo ɗum. Ɗoftee ko Allah yamiri on kon kisan.
(10) Si on gaynii julde Juma nden, haray saakitoree ka leydi ɗaɓɓugol arsike halal e huntugol haajuuji mon, ɗaɓɓiron ɓural Allah ngal sooda yeeya ko dagii, jantoron innde Allah e mun ko ɗuuɗi, woto yiilaade arsuka soklin mon juulde, belajo'o on malira dañugol ko yiɗuɗon, e daɗugol ko huluɗon.
(11) Si yoga e juulɓe ɓen yi'ii ngeyngu maa fijindaaru, ɓe yalta ɓe hammira ton, ɓe acce an Nulaaɗo, hiɗa darii ka ganngungal. Awa maakan ɓe an Nulaaɗo : ko njoɓdi golle moƴƴe ɗen ka Allah ɓuri moƴƴude e dii ngeyngu e fijindaaru ngu hammirɗon e mun, si tawii ko laawol Alla yaltini on Ko Allah ɓuri Moƴƴude e arsikooɓe ɓen.