(1) Allah no janntoo fii Ñalaande ummital ndee fow tawetee e mun.
(2) Refti O mawniniri ɗum ngal lamndal : ko honɗum woni fii Darngal?
(3) E ko anndin maa ko woni fii ngal Darngal?
(4) Samuudu yimɓe Saalihu ɓen, e Aadi en yimɓe Huudu ɓen fennii Darngal duɗɗay ngal yimɓe hakkee kul huli maggal.
(5) Samuuda en kan, Allah halkirno ɓe haacaango yottiingo satteende e kulaleeji.
(6) Aadi en kan, Allah halkir ɓe henndu ɓuuɓundu haa feƴƴiti, tiiɗundu e maɓɓe.
(7) Allah wurti henndu ndun e hoore maɓɓe dumunna jemmaaji jeeɗiɗi e ñalormaaje jeetati, ndu lanni fii maɓɓe haa ka hatti. Yi'aa yimɓe ɓen e koɗooli mun hino halkaa e leydi, wa si tawii hara ko binndeeje tamaro yanɗe e leydi yoorundi.
(8) Taw si a yi'anay ɓe fittaandu heddii ndu ɓaawo lette ɗen yanude e maɓɓe?
(9) Fir'awna e mofte adinooɓe mo ɓen, e ca'e lettiranooɗe wayliteede ɗen, woni yimɓe Luutu ɓen, ɓe ardi e kuuɗe bonɗe immorde e sirku e geddi.
(10) Kala maɓɓe yeddi Nulaaɗo mun on, ɓe fenni mo; Allah nanngiri ɓe nanngal ɓeydiingal ko O timminta halkude ɓe.
(11) Ko Menen woni, fewndo ndiyam ɗam hummbunoo, ronndinoo ɓen wonunooɓe keeceele mon ka laana dogayka, ka Annabi Nuuhu lesunoo e yamiroore Amen, fii ko waɗɗoɗon e mun.
(12) Men waɗiri kan laana e fillayee makka on, waaju ko dallinoree e halkeede yedduɓe ɓen, daɗnda gomɗimɓe ɓen, nowru nanayndu nana ɗum.
(13) Si Malaa'ikaajo halfinaaɗo wuttugol on ka allaandu wuttii wuttaande wootere, ko ndeen woni ɗiɗaɓiire nden.
(14) Leydi ndin e pelle ɗen ɓamtee, ɗe mo ɓññe mo ɓññannde sattunde, pecce leydi ndi e pelle ɗe sewi.
(15) Nden ɗum fow waɗata, Darngal ngal daroo.
(16) Kammu ngun seekora nden ñalnde, sabu jippagol Malaa'ika'en, hara hingu lo'i, ɓaawo ngu wonnde sattungu jogondirngu.
(17) Hara Malaa'ika'en no wontiri ka seraaji maggu, njeetato e Malaa'ikaaɓe ɓannitaaɓe ɓen ronndoo Arsi Joomi maa kin nden ñalnde.
(18) Nden ñalnde, ko onon weeɓitetee ka Allah, onon ɓee yimɓe. Hay huunde e fii mon suuɗotaako Mo. Allah ko ƴellitoto fii maɓɓe on fow.
(19) Si ko jonnitiroyaaɗo talkuru golle mun ɗen ka ñaamo mun, on weltoroyay wi'ugol : Jaɓee ! Janngon talkuru golle am ɗen.
(20) Min mi fellitu ka aduna, wonnde mi immmintinoyte, mi hawra e njoɓdi am ndin.
(21) Hara himo e nguurndam welɗam, hakkee neema duumiiɗo ko o yi'ata.
(22) E nder Aljanna toowuɗo nokku e darja.
(23) Aljanna mo teɓateeriiji mun weli heɓude.
(24) Ɓe teddiniree wi'aneede : ñaamee yariron ko lorra woo alaa e mu'un, sabu ko ardinirɗon kon golle moƴƴe e ñalaaɗe feƴƴunooɗe aduna.
(25) Si tawii non ko jonnitiraaɗo talkuru golle mun ɗen ka nano mun, on wi'oyay : Ee bone am! Haananiino lam hara mi joniitaaka talkuru golle am ɗen, sabu kuuɗe bone ko woni e mayru kon, waɗata haa mi lettee.
(26) Hara mi anndaali hay huunde e ko wonata ñaawoore am.
(27) Hara maayde am nden wonuno timmoode am nde immintiŋtaake e mun fes.
(28) Jawdi am ndin nafiraali lam duñangol lam lette Allah ɗen.
(29) Cemmbe e jaahu am ko mi wallitoraynoo fow bonntirii lam.
(30) Malaa'ika'en wi'anee : nanngee mo, kombon mo haa e daande.
(31) Refti naadon mo ka Yiite fii no o meeɗira nguleendi magge.
(32) Refti naadon mo e nder jolokooje ɗe junndi mun woni cappanɗe jeeɗiɗi sogonal.
(33) Tawde pellet, o gomɗinaano Allah Mawɗo On.
(34) O reerɗintaano woɗɓe goo e ñammingol miskiino.
(35) Giɗo ɓadondiraaɗo alanaamo Ñalnde Darngal, ko duñanamo lette ɗen.
(36) Wanaa ñaametee woodani mo, si wanaa ko siiɓaa e ɓalli yimɓe Yiite ɓen.
(37) Hay gooto ñaametee ndin ƴiƴƴiƴiri, si wanaa yedduɓe e bakkondimɓe ɓen.
(38) Allah woondirii ko yi'oton kon.
(39) O woondiri kadi ko on yi'ataa kon.
(40) Pellet, Alqur'aana ko daalol Allah, ngol O Nulaaɗo Makko tedduɗo on janngata e dow mon.
(41) Wanaa nde konnguɗi yimoowo; tawde nde yuɓɓiraaka wa gimɗi. Kono fanɗii ko gomɗinton.
(42) Nde wanaa kadi nde konnguɗi mbileejo, tawde mbilewu hino seedi e Alqur'aana. Kono fanɗii ko waajitotoɗon.
(43) Ko jippiniraande ka Jeyɗo tageefo ngon fow.
(44) Si tawno Muhammadu fefindino e Amen yoga e konnguɗi ɗi iwraani e Amen.
(45) Ko pellet, Men yoɓtotono bmo, Men naangira mo doole e kattal.
(46) Hooti Men taƴayno e makko ɗaɗol yottiingol e ɓernde nden.
(47) Alaa hay gooto e mo'on haɗoowo e makko, himo daɗndii e fefindagol e Amen fii mon.
(48) Pellet, Alqur'aana ko waaju hulirooɓe Joomi mun ɓen ɗoftagol yamiraaɗi Makko ɗin, e woɗɗitoo haɗaaɗi Makko ɗin.
(49) Haray kadi, Meɗen anndi fennooɓe ndee Alqur'aanaare ina e mon.
(50) Pellet non, fennugol Alqur'aana ngol, ko nimse mawɗe wonoyta Ñalnde Darngal.
(51) Pellet kadi, Alqur'aana ko goonga yananaaɗo mo sikke alaa e mu'un, wonnde ko ka Allah nde iwri.
(52) Haray an Nulaaɗo, subbunhinor innde Joomi maa, kala ko haandaani e Makko, jantoɗaa innde Joomi maa Mawɗo On.