(1) Gooto e sirkooɓe ɓen toranike e hoore mun e yimɓe mun ɓen lette, himo jalkita, sikkugol lette ɗen waɗaatah. Hara ɗum waɗay Ñalnde Darngal.
(2) Wonannde yedduɓe Allah ɓen, alah duñanoowo ɓe ɗee lette.
(3) Ko immorde ka Allha, Jom toowal e darja, e ɓure e neemaaji.
(4) Malaa'ika'en wonndude e Jibriilu hino e ƴawa e ɗin darjaaji Ñalnde Darngal, juutungal, eɓɓirtengal duuɓi ujune cappanɗe jowi.
(5) Muñño tun, yo Nulaaɗo, muñal ngal jillah ɗenƴagol maa wullitagol.
(6) Kamɓe hiɓe reeni ɗee lette ko woɗɗiiɗe tultooje.
(7) Menen le Meɗen reeni ɗe ko ɓadiiɗe, yanayɗe feere mun alaa.
(8) Ñalnde kammu ngun wa'oyta wano sila maa kaŋŋe taayinaaɗum.
(9) Pelle ɗen kadi wa'oya wano hottollo goobaako saraako.
(10) Ka ɓadondiraaɗo lamdotaako fii musiɗɗo mun, tawde haray mo kala hino sokliri hoore mun.
(11) Kala maɓɓe yi'ay ɓadondiraaɗo mun on ka suuɗaaki. Wondude e ɗum fof gooto lamndotaako fii oya hakkee ko annde. Hannduɗo e Yiite ngen yeloo jonnugol ɓiɗɓe makko ɓen fii sottorgol mo lette ɗen.
(12) O sottora gennda makko e neene gooto makko on.
(13) o sottora kadi gorol makko ɓaɗiiɓe mo, ɓen ɓannitaynoo ɓe mo si sattii.
(14) O sottora kadi kala yimɓe e jinna ekw ko woni kon ka leydi, refti o jonnira ɗum fii sottoragol, daɗnda hoore makko lette Yiite ngen.
(15) Ɗum gasirtaa wano bonɗo on yelori. Yiite laakara ngen ko uuyaynge huɓɓa.
(16) Ɓoltaynge wippita guri hoore; hakkee ko nge wuli e konge huɓɓi.
(17) Hinge nodda on ɗuurniiɗo goonga, o hucciti o salii gomɗinnde mbo o ronki gollude.
(18) O mooɓi jawle, o mari ndi fii wata o nafqu ndi e laawol Allah.
(19) Pellet, neɗɗo on tagaama ko o tiiɗuɗo reerɗugol.
(20) Si lorra nawnaare maa baasal memii mo, tawaa ko o fanɗuɗo muñal.
(21) Si ko heɓii mbo ko weltinta hono amo e ngalu heɓii mo, o wona tiiɗuɗo salorgol ɗum e fii laawol Allah ngol.
(22) Si wanaa juulooɓe ɓen, ɓen ɗon hino hisi e ɗin jikkuuji ŋiñaaɗi.
(23) Ɓen tawɓe ko duumiiɓe e juulde maɓɓe nden, ɓe welsindotaako e mayre, ɓe tottira nde e waqtu mayre happaaɗo on.
(24) E ɓen tawɓe hino e jawle maɓɓe ɗen geɓal dottangal farlangal.
(25) Geɓal nagl ɓe ittanta torotooɗo ɓe e baaso mo torortaako.
(26) E ɓen goooginanyɓe Ñalaande Darngal nden. Ñalnde Allah yoɓitoyta kala e ko o haanndi kon.
(27) E ɓen tawɓe hiɓe huli lette Joomi maɓɓe ɗen, e hoore ko ɓe ardini e golle moƴƴe kon fow.
(28) Pellet, lette Joomi maɓɓe ɗen, ko hulɓiniiɗe ɗe haqqilɗo haanaa hoolaade daɗugol.
(29) E ɓen tawɓe hino reenirɓe farjuuji maɓɓe ɗin : surragol woɗɗitoo e pankare.
(30) Si wanaa e rewɓe maɓɓe ɓen maa e horɓe ko ɓe jeyi kon, ɓe feletaake ɗon on fii dakmitorgol ɓen mbalndi e tanaa mun.
(31) Kala non ɗaɓɓuɗo ka dakmitora hara wanaa e ɓen rewɓe e horɓe jantaaɓe, haray ko ɓen woi yawtuɓe keeri Allah ɗin.
(32) E ɓen tawɓe si ɓe hoolnaama e jawle e gunndoo ekw, e aynitooɓe ahadiiji maɓɓe ɗin e yimɓe ɓen kulol wata hoolaare bonu ɓe firtatah aadi.
(33) E ɓen tawɓe ko ñiiɓirɓe e seedeeji maɓɓe ɗin no haaniri, tawata jeydal maa e ngayngu battintaa e mun.
(34) E ɓen tawɓe hiɓe reenorii e julde maɓɓe nden, tottirgol nden e waqtu mayre, wonndude e laaɓal e deeƴere, hara huunde sokoliŋtaa ɓe e mayre.
(35) Ɓen siforaaɓe ɗin sifaaji, ɓe teddiniroyte e Aljannaaji, neemaaji ñiiɓuɗi, e ndaaroygol Yeeso Allah Teddungo ngon.
(36) E ko nanngi sirkooɓe jeyaaɓe e yimɓe maa ɓen, an Nulaaɗo, hiɓe heñora fennugol ma?
(37) Hiɓe huuɓitir-maa ka ñaamo e ka nano, koɓe dentoy-dentoy.
(38) Hara gooto kala e maɓɓe tamƴini nde Allah naadoyta mo Aljanna neemaaji, ka o neeminorta neemaaji duumiiɗi, e hoore ko o heddii e keeferaaku mum?
(39) Wanaa no ɓe sikkiri non ! Men tagiriɓe e ko ɓe anndi fii mun, woni ndihal hoykal, ɓe lohiri non kamɓe kadi, tawde ɓe waawah nafude ko'e maɓɓe wanah fii lorra. Ko honno non ɓe townitorta?
(40) Alla woondiri Hoore Makko ko Kanko woni jom Funnaangeeji e Hirnaangeeji naange e lewru e denndaangal koode wonde ko O kattanɗo.
(41) Meɗen hattani wattirgol ɓe woɗɓe goo, ɗoftotooɓe Allah, Men halka fii maɓɓe kamɓe. Men siforaa ronkooɓe gaynude fii maɓɓe, wattitira ɓe woɗɓe goo si Men faandanike ɗum.
(42) Accuɓe yo Nulaaɗo, ɓe jumpa e meere e majjere ko woni e mun, ɓe fija e nguurndam maɓɓe aduna ɗam haa ɓe hawroya e Ñalaande Darngal nde ɓe kammbiranaa nden ka Alqur'aana.
(43) Ñalnde ɓe yaltirorta e gaburuuji ɗin heñaare, wa si tawii hara ko kaaƴe sanamu ɓe adandirta.
(44) Hara gite maɓɓe no heli, koyeera no suddi ɓe. Ko nden woni ñalaande nde ɓe kammbirananoo nden e aduna, nde ɓe ittaanoo yiila e mun.