(1) 88-1 ایا تا ته (يعنې خلقو لره) د پټوونكي (قیامت) خبر راغلى دى؟
(2) 88-2 څه مخونه به په دغې ورځ كې خوار (او) وېرېدونكي وي
(3) 88-3 سخت كار كوونكي، ستړي كېدونكي به وي
(4) 88-4 ډېر ګرم اور ته به ننوځي
(5) 88-5 په دوى به له ډېرې ګرمې چېنې نه اوبه څښولى شي
(6) 88-6 د دوى لپاره به طعام نه وي مګر له اغزنې ترخې ونې نه
(7) 88-7 چې نه څربول كوي او نه هېڅ لوږه لرې كوي
(8) 88-8 څه مخونه به په دغې ورځ كې تروتازه وي
(9) 88-9 په خپل كوشش به راضي (خوشاله) وي
(10) 88-10 په اوچت جنت كې به وي
(11) 88-11 دوى به په دغه (جنت) كې هېڅ بېكاره خبره نه اوري
(12) 88-12 په دغه (جنت) كې روانه چینه ده
(13) 88-13 په دغه (جنت) كې اوچت تختونه دي
(14) 88-14 او (په اندازې سره) ایښودل شوي جامونه دي
(15) 88-15 او په قطار كې ایښودل شوي بالښتونه دي
(16) 88-16 او غوړول شوي اعلی فرشونه دي
(17) 88-17 ایا نو دوى اوښانو ته نه ګوري چې دوى څرنګه پیدا كړى شوي دي؟
(18) 88-18 او اسمان ته چې دى څنګه اوچت كړى شوى دى؟
(19) 88-19 او غرونو ته چې دوى څنګه ودرول شوي دي ؟
(20) 88-20 او ځمكې ته چې څنګه غوړول شوې ده؟
(21) 88-21 نو ته پند وركړه، بېشكه ته خو يواځې پند وركوونكى يې
(22) 88-22 ته په دوى باندې مسلط كړى شوى نه يې
(23) 88-23 مګر هغه څوك چې (له ایمانه) وګرځي او كافر شي
(24) 88-24 نو الله به ده ته عذاب وركړي تر ټولو لوى عذاب
(25) 88-25 بېشكه خاص مونږ ته د دوى بېرته راتګ دى
(26) 88-26 بیا یقینًا د دوى حساب زمونږ په غاړه دى