(1) Уэ Iиман къэзыхьахэ! Алыхьымрэ и лIыкIуэмрэ япэ зивмыгъэщ. Алыхьым фыщышынэ, ипэжыпIэкIэ Алыхьыр Зэхэзыхщ, ЗыщIэщ.
(2) Уэ Iиман къэзыхьахэ, фи макъхэр бегъымбарым и макъым нэхърэ нэхъ ину къэвмыIэт, фэ зым зыр фызэрепсалъэм хуэдэуи ину фемыпсалъэ, фи Iуэхухэр хэвмыгъэкIуадэ, ар фэри зыхэвмыщIэурэ.
(3) Алыхьым и лIыкIуэм и деж зи макъхэр зыгъэцIыкIухэм ягухэр Алыхьым яхузэIуихащ тхьэшынагъуэм. Абыхэм яхуигъэхьэзыращ гъэгъуныгъэрэ псапэшхуэрэ.
(4) ИпэжыпIэкIэ, пэшхэм я щIыбагъкIэ къоджэхэм я нэхъыбэм къагурыIуэкъым.
(5) Абыхэм шэчыныгъэ зыхагъэлъу ежьахэтэмэ укъыщIэкIыху я дежым нэхъыфIынут абыхэм щхьэкIэ. Алыхьыр Зыгъэгъущ, ГущIэгъущIщ.
(6) Уэ, Iиман къэзыхьахэ, цIыху мыхъуэмыщIэм хъыбар къыфхуихьамэ, ар вгъэунэху фымыщIэу цIыхухэм лей явмыхыну, итIанэ фыхущIегъуэжынщ.
(7) ЗэвгъащIэ, фэ къыфхэтщ Алыхьым и лIыкIуэр, ар Iуэху куэдымкIэ фэ къыфхуэжыIэщIэтэмэ, гугъуехьым шэч хэмылъу фыхэхуэнт. Ауэ Алыхьым Iиманыр фIыуэ фигъэлъэгъуащ, ар фигухэми фхуигъэдэхащ, джаурыгъэри, мыхъумыщIагъэри, мыдаIуэнри фIыуэ фымылъагъуу ищIащ. Апхуэдэхэщ гъуэгу захуэм ирикIуэхэр.
(8) Алыхьым и фIыщIэщ икIи и фIыгъуэщ. Алыхьыр ЗыщIэщ, АкъылыфIэщ.
(9) Iиман къэзыхьахэм щыщу гупитI зэзауэхэмэ, ахэр зэгурывгъэIуэж. Зыр адрейм тебанэмэ, тебанэм фезауэ Алыхьым и унафэм хуимыгъэзэжыху. Абым игъэзэжмэ, ахэр зэгурывгъаIуэ хейуэ икIи захуэу. ИпэжыпIэкIэ, Алыхьым фIыуэ елъагъур хейхэр.
(10) ИпэжыпIэкIэ, Iиман къэзыхьахэр зэкъуэшхэщи фи къуэшхэр зэвгъэфIыжхэ, Алыхьми фыщышынэ, гущIэгъу къыфхуащIынкIэ мэхъур.
(11) Уэ, Iиман къэзыхьахэ, зы лъэпкъым адрейр щIэнэкIалъэ иремыщI, ахэр нэхъыфIу къыщIэкIынкIэ мэхъур. ИкIи фызхэми адрей фызхэр (щIэнэкIалъэ ирамыщI), ахэр езыхэм нэхърэ нэхъыфIу къыщIэкIынкIэ мэхъу. Зым адрейм игу къевмыгъауэ, цIэ гуауэхэкIи зыр зым фемыджэ. Сыту Iеищэ мыхъумыщIэу къоджэнхэр Iиманым иужь. Тобэ къэзмыхьыжхэр атIэ залымхэщ.
(12) Уэ, Iиман къэзыхьахэ, гугъэ куэдхэр фымыщI, ипэжыпIэкIэ гугъэ фщIы гуэрхэр гуэныхьщ. ИкIи зыр адрейм фыкIэлъымыплъ, зыр адрейми фытемыпсэлъыхь. И къуэш лIам и лыр ишхыну фIэфIу ара фэ фщыщ гуэрым, ар фи гум темыхуэу? Алыхьым фыщышынэ, ипэжыпIэкIэ, Алыхьыр Зыгъэгъущ, ГущIэгъущIщ.
(13) Уэ, цIыхухэ! Дэ цIыхухъумрэ цIыхубзымрэ факъытедгъэхъукIащ, цIыхубэрэ лъэпкъхэурэ фызэщхьэщыдгъэкIащ фыкъызэрыщIэным щхьэкIэ. Алыхьым и деж ипэжыпIэкIэ нэхъ лъапIэр нэхъ тхьэшынагъуэ зыхэлъыращ фэ фщыщу. ИпэжыпIэкIэ, Алыхьыр ЗыщIэщ, Щыгъуазэщ.
(14) Бедуинхэм жаIащ: "Дэ Iиман къэтхьащ". ЖыIэ: "Фэ Iиман къэфхьакъым, атIэ жыфIэ: "Дэ муслъымэн дыхъуащ". Iиманыр фигухэм ихьакъым иджыри. Алыхьымрэ и лIыкIуэмрэ фыхуэжыIэщIэмэ, Абы зыкIи фщIахэр игъэцIыкIунукъым. ИпэжыпIэкIэ, Алыхьыр Зыгъэгъущ, ГущIэгъущIщ".
(15) МуIуминхэр Алыхьымрэ и лIыкIуэмрэ зи фIэщ хъуахэращ, итIанэ шэч къытезымыхьэхэр, Алыхьым и цIэкIэ я мылъкукIи, я псэхэкIи зауэхэр. Ахэращ къэзыгъэпэжахэр.
(16) ЖыIэ: "Алыхьым евгъащIэу ара фи диныр? Алыхьым ещIэр уафэхэми щыIэр, щIылъэми щыIэр, Алыхьым сытри ещIэр".
(17) Абыхэм къыуаIуэкIыу ара Ислам диныр къызэращтар? ЖыIэ: "Фэ Исламыр къызэрыфщтар къызэвмыIуэкI, атIэ Алыхьым фIыщIэ къыфхуищIауэ аращ Iиманым фыхуишэри, а жыфIэр пэжу щытмэ езы".
(18) Алыхьым ещIэр уафэхэми щIылъэми щыущэхуар, Алыхьым елъагъур фэ фщIэр.