(1) ߤߍ߲߬ ߊߟߎ߫ ߡߐ߱ ߟߎ߬ ߸ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߎ߫ ߡߊ߰ߙߌ ߡߊ߬ ߘߋ߬ ، ߓߊߏ߬ ߟߐ߬ߓߊ ߕߎ߬ߡߊ߬ߣߊ ߦߙߍߦߙߍ ߦߋ߫ ߞߏߓߊ ߖߍ߬ߘߍ ߟߋ߬ ߘߌ߫.
(2) ߏ߬ ߟߏ߲ ߠߋ߬ ߸ ߊߟߎ߫ ߘߴߊ߬ ߦߋ߫ ߘߋ߲߫ ߠߊߡߌ߲߫ ߡߛߏ ߞߋ߬ߟߋ߲߬ߞߋ߬ߟߋ߲߬ߣߊ ߓߘߊ߫ ߝߌ߬ߟߌ߫ ߊ߬ߟߎ߬ ߟߊ߫ ߘߋ߲߫ ߠߊߡߌ߲߬ߣߍ߲ ߡߊ߬ ، ߊ߬ ߣߌ߫ ߞߣߐߡߊ ߞߋ߬ߟߋ߲߬ߞߋ߬ߟߋ߲߬ߣߊ ߞߣߐ ߘߌ߫ ߥߙߏ߬ߥߙߏ߫ ، ߌ ߘߌ߫ ߡߐ߱ ߟߎ߬ ߡߌߟߏߣߍ߲ ߦߋ߫ ߸ ߞߵߊ߬ ߕߘߍ߬ ߊ߬ߟߎ߬ ߡߌߟߏߣߍ߲߫ ߕߍ߫ ( ߘߟߐ߬ ߓߟߏ߫ ) ، ߞߏ߬ߣߌ߲߬ ߊߟߊ߫ ߟߊ߫ ߖߊ߲߰ߞߕߊ ߟߋ߫ ߜߍ߬ߟߍ߲߬ߡߊ߲߫.
(3) ߡߐ߱ ߘߏ߫ ߓߍ߫ ߸ ߏ߬ ߟߋ ߘߊߘߛߐߛߐ ߞߍ߫ ߟߴߊߟߊ߫ ߞߏ ߘߐ߫ ߊ߬ ߞߎ߲߬ߝߍ߬ ߕߋ߲߬ ߝߎ߯ ، ߊ߬ ߣߌ߫ ߞߊ߬ ߜߘߍ߬ ߡߙߎߕߌߣߍ߲ ߘߊ߬ߡߊ ߟߊߓߊ߬ߕߏ߬.
(4) ߊ߬ ߘߏ߲߬ ߛߓߍߣߴߏ߬ ߡߊ߬ ߟߋ߬ ߸ ߞߏ߫ ߡߍ߲ ߓߊ߯ ߊ߬ ߓߌ߬ߛߌ߫ ߊ߬ ߟߊ߫ ߸ ߊ߬ ߘߴߏ߬ ߟߊߝߟߌ߬ ، ߊ߬ ߣߴߊ߬ ߘߴߏ߬ ߢߍߛߌ߲߫ ߖߌߖߌ ߖߊ߲߰ߞߕߊ ߡߊ߬.
(5) ߤߍ߲߬ ߊߟߎ߬ ߡߐ߱ ߟߎ߬ ߸ ߣߌ߫ ߛߌߞߊ߫ ߞߍ߫ ߘߴߊߟߎ߫ ߟߊ߫ ߥߟߌ߬ ߞߏ ߘߐ߫ ߸ ߒ߬ߓߊ߬ ߒ߬ߠߎ߫ ߞߵߊߟߎ߫ ߘߊ߲߫ ߓߎ߰ߘߌ ߟߋ߬ ߘߐ߫ ، ߏ߬ ߞߐ߫ ߛߖߌߣߍ߲߫ ߣߙߐߘߐߖߎ߮ ߘߐ߫ ߸ ߏ߬ ߞߐ߫ ߖߋ߬ߟߌ߬ ߛߌ߲ߓߌ ߘߐ߫ ߸ ߏ߬ ߞߐ߫ ߛߓߏ߬ ߞߎ߬ߘߎ߲߬ߣߍ߲ ߘߐ߫ ، ߏ߬ ߘߏ߫ ߟߎ߫ ߦߋ߫ ߘߊ߲ߕߊ߫ ߘߌ߫ ߸ ߘߏ߫ ߟߎ߫ ߕߍ߫ ߘߊ߲ߕߊ߫ ߘߌ߫ ، ߖߐ߲߰ߛߊ߫ ߊ߲ ߘߌ߫ ߞߏ ߟߎ߬ ߘߐߞߣߍ߫ ߊߟߎ߫ ߦߋ߫ ، ߊ߲ ߘߏ߲߬ ߦߋ߫ ߝߋ߲߫ ߠߎ߫ ߟߋ߬ ߡߊߞߍ߫ ߟߊ߫ ߘߋ߲ߛߏ ߟߎ߬ ߘߐ߫ ( ߛߌߙߋ߲߫ ߟߊߞߍߣߍ߲ ߠߎ߬ ߘߐ߫ ) ߡߍ߲ ߓߊ߯ ߒ߬ ߘߌߦߊ߫ ߸ ߝߏ߫ ߞߊ߬ ߛߋ߫ ߛߕߊ߫ ߟߐ߯ߟߊߣߍ߲ ߡߊ߬ ، ߏ߬ ߟߋ ߞߐ߫ ߊ߲ ߘߴߊߟߎ߫ ߢߋߙߌ߲ߠߡߊ ߟߊߓߐ߫ ، ߏ߬ ߟߋ ߞߐ߫ ߊߟߎ߫ ߘߌߣߊ߬ ߛߋ߫ ߊߟߎ߫ ߟߊ߫ ߞߐ߮ ߘߝߊ ߡߊ߬ ، ߊߟߎ߫ ߘߏ߫ ߓߍ߫ ߸ ߏ߬ ߘߌ߫ ߛߏߡߊߦߟߍߡߊ߲߫ (ߖߏߣߊ߫) ، ߊߟߎ߫ ߘߏ߫ ߜߘߍ߫ ߓߍ߫ ߸ ߏ߬ ߘߌ߫ ߟߊߛߊ߬ߦߌ߫ ߛߌ߭ ߘߐ߫ ߢߊ߰ߙߊ߬ߒߞߋ ߡߊ߬ ߸ ߛߴߊ߬ ߞߊߣߊ߬ ߝߏߦߌ߬ ߟߐ߲߫ ߟߐ߲ߠߌ߲߫ ߞߘߐ߬ߡߊ߲ ߞߐ߫ ، ߌ ߦߋ߫ ߘߎ߱ ߝߣߊ߫ ߖߊ߬ߣߍ߲ ߦߋ߫ ߟߊ߫ ߞߛߍߞߛߍ߫ ، ߣߴߊ߲ ߞߊ߬ ߖߌ ߟߊߖߌ߰ ߊ߬ ߞߊ߲߬ ߸ ߊ߬ ߘߴߊ߬ ߟߊߡߊ߰ ߸ ߊ߬ ߣߴߊ߬ ߘߌ߫ ߝߎߣߎ߲߫ ߞߊ߬ ߝߌ߬ߟߊ߬ߓߊ߫ ߗߋ߲߱ ߓߍ߯ ߟߊߝߍߘߍ߲߫.
(6) ߒ߬ߓߊ߬ ߣߌ߲߬ ߓߍ߯ ߞߍߣߍ߲߫ ߠߋ߬ ߸ ߓߊߏ߬ ߊߟߊ߫ ߟߋ߫ ߕߎ߬ߢߊ ߘߌ߫ ، ߊ߬ ߣߴߊ߬ߟߋ ߟߋ߬ ߛߎ߭ ߟߎ߬ ߟߊߞߎߣߎ߲߫ ߠߊ߫ ، ߊ߬ ߣߌ߫ ߝߣߊ߫ ߊ߬ߟߋ ߟߋ߬ ߛߋ߫ ߟߊ߫ ߞߏ ߓߍ߯ ߟߊ߫.
(7) ߊ߬ ߣߌ߫ ߞߏ߫ ߟߐ߬ߓߊ ߣߊ߬ߕߐ߫ ߟߋ߬ ߸ ߛߌߞߊ߫ ߛߌ߫ ߕߍ߫ ߊ߬ ߘߐ߫ ، ߊ߬ ߣߌ߫ ߞߏ߫ ߊߟߊ߫ ߟߋ߫ ߣߊ߬ߕߐ߫ ߛߊ߬ߙߌ߬ ߘߐ߬ ߡߐ߮ ߟߎ߬ ߟߊߥߟߌ߬ ߟߊ߫.
(8) ߘߏ߫ ߦߋ߫ ߡߐ߱ ߟߎ߬ ߘߐ߫ ߸ ߏ߬ ߟߋ ߘߊߘߛߐߛߐ ߞߍ߫ ߟߴߊߟߊ߫ ߞߏ ߘߐ߫ ߊ߬ ߞߎ߲߬ߝߍ߬ ߕߋ߲߬ ߝߎ߯ ، ߞߵߊ߬ ߕߘߍ߬ ߟߐ߲ߠߌ߲߫ ߕߍ߫ ߸ ߞߊ߲ߘߦߊ߫ ߕߍ߫ ߸ ߟߍߙߊ߫ ߦߋߟߋ߲ߡߊ߫ ߕߍ߫.
(9) ߊ߬ ߦߴߊ߬ ߞߙߎ߬ ߟߴߊ߬ ߝߊ߲߬ ߞߋߟߋ߲ ߞߊ߲߬ ߠߋ߬ ߸ ߛߴߊ߬ ߘߌ߫ ߟߊ߬ߝߟߌ߬ߟߌ ߞߍ߫ ߊߟߊ߫ ߟߊ߫ ߛߌߟߊ ߡߊ߬ ߸ ߘߐ߯ߦߡߊ ߟߴߏ߬ ߢߍ߫ ߘߎߢߊߘߐߕߍ߮ ߘߐ߫ ، ߒ߬ ߘߏ߲߬ ߘߴߊ߬ ߡߊߜߏ߬ߙߏ߫ ߟߐ߬ߓߊ ߟߏ߲ ߖߋ߬ߣߌ߲߬ߠߌ߲ ߖߊ߲߰ߞߕߊ ߟߊ߫.
(10) ߞߏ߫ ߣߌ߲߬ ߡߊߛߐ߬ߘߐ߲߬ߣߍ߲߬ ߞߏ߫ ߟߋ߬ ߝߍ߬ ߸ ߌ ߓߟߏ߫ ߝߌ߬ߟߊ ߞߊ߬ ߡߍ߲ ߘߐߓߍ߲߬ ߌ ߢߍ߫ ، ߣߴߏ߬ ߕߍ߫ ߊߟߊ߫ ߕߍ߫ ߖߐ߲߭ ߠߎ߫ ߕߐ߬ߢߍ߰ߓߊ߯ ߘߌ߫.
(11) ߘߏ߫ ߦߋ߫ ߡߐ߱ ߟߎ߬ ߘߐ߫ ߸ ߏ߬ ߦߋ߫ ߊߟߊ߫ ߓߊ߬ߕߏ߬ ߟߊ߫ ߝߌ߬ߟߊ߲ߝߌ߬ߟߊ߲ ߠߋ߫ ߞߊ߲߬ ، ߣߴߊ߬ ߓߍ߲߬ ߘߊ߫ ߤߙߊ߫ ߡߊ߬ ߸ ߊ߬ ߘߴߊ߬ ߡߝߊ߫ ( ߓߊ߬ߕߏ ) ߞߊ߲߬ ، ߣߴߊ߬ ߘߏ߲߬ ߓߍ߲߬ ߘߊ߫ ߞߘߐߓߐߟߌ߫ ( ߜߍߟߍ߲߫ ) ߡߊ߬ ߸ ߊ߬ ߘߌ߫ ߛߊ߬ߦߌ߲߬ ߊ߬ ߢߊ߫ ( ߞߘߐ) ߡߊ߬ ߸ ߞߊ߬ ߓߣߐ߬ ߘߎߢߊ߫ ߣߌ߫ ߟߊߞߌߙߊ߫ ߓߍ߯ ߘߐ߫ ، ߒ߬ߓߊ߬ ߏ߬ ߟߋ ߓߣߐ߬ ߘߐ߬ߜߍ ߘߌ߫ ߛߊ߫.
(12) ߊ߬ ߦߋ߫ ߝߋ߲߫ ߠߋ߬ ߞߟߌ߫ ߟߊ߫ ߞߵߊߟߊ߫ ߕߏ߫ ߡߍ߲ ߕߍ߫ ߊ߬ ߕߙߐ߫ ߟߊ߫ ߸ ߊ߬ ߘߏ߲߬ ߕߍ߫ ߊ߬ ߣߝߊ߫ ߟߊ߫ ، ߒ߬ߓߊ߬ ߏ߬ ߟߋ ߝߟߌ߬ ߔߘߋߞߟߋ ߟߌ߫.
(13) ߊ߬ ߝߊ߲߭ ߦߋ߫ ߝߋ߲߫ ߠߋ߬ ߞߟߌ߫ ߟߊ߫ ߸ ߡߍ߲ ߡߊ߲߬ߕߙߐ ߛߎ߬ߘߎ߲߬ߡߊ߲߫ ߊ߬ ߣߝߊ ߘߌ߫ ، ߏ߬ ߦߋ߫ ߡߊ߰ߙߌ߬ ߖߎ߯ ߘߌ߫ ߞߟߋ߫ ، ߊ߬ ߣߴߊ߬ ߦߋ߫ ߞߏߟߊߘߍߢߐ߲߯ ߖߎ߯ ߘߌ߫ ߞߟߋ߫.
(14) ߊߟߊ߫ ߦߋ߫ ߘߍ߲߬ߞߣߍ߬ߦߊ߬ߓߊ߯ ߢߌ߬ߡߊ߬ ߞߍ߬ߟߊ ߟߎ߫ ߟߋ߬ ߟߊߘߏ߲߬ ߠߊ߫ ߣߊߞߐ ߟߎ߬ ߘߐ߫ ߸ ߞߐ߬ߢߊ ߟߎ߬ ߦߋ߫ ߥߦߏ߬ ߟߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ، ߊߟߊ߫ ߘߏ߲߬ ߦߋ߫ ߞߏ߫ ߟߋ߬ ߞߍ߫ ߟߊ߫ ߸ ߡߍ߲ ߓߊ߯ ߊ߬ ߘߌߦߊ߫.
(15) ߊ߬ ߓߊ߯ ߞߍ߫ ߡߍ߲ ߢߣߊ߫ ߞߏ߫ ߊߟߊ߫ ߕߍߣߊ߬ ‹ ߞߋߟߊ › ߘߍ߬ߡߍ߲߬ ߠߊ߫ ߘߎߢߊ߫ ߣߌ߫ ߟߊߞߌߙߊ߫ ߸ ߏ߬ ߦߋ߫ ߖߎ߬ߟߎ ߘߏ߫ ߘߐߝߎߟߋ߲߫ ߞߊ߬ ߕߊ߯ ߛߊ߲ ߡߊ߬ ߸ ߊ߬ ߦߋ߫ ߓߊ߲߫ ߞߵߏ ߕߍ߰ ߜߊߘߌ߫ ߸ ߊ߬ ߦߴߊ߬ ߝߟߍ߫ ߛߊ߫ ߸ ߣߴߊ߬ ߘߊ߬ߓߊߙߌ ߏ߬ ߘߴߊ߬ ߡߐߣߍ߫ ߞߏ ߘߐߛߊ߬.
(16) ߊ߲ ߘߏ߲߬ ߣߊ߬ ‹ ߞߎ߬ߙߊ߬ߣߊ › ߟߊߖߌ߰ ߟߊ߫ ߟߝߊߙߌ߫ ߘߐߞߣߍߣߍ߲ ߠߎ߬ ߘߌ߫ ߕߋ߲߬ ߠߋ߬ ، ߒ߬ߞߵߊߟߊ߫ ߦߋ߫ ߡߐ߰ ߟߋ߬ ߞߊ߲ߘߊ߫ ߟߊ߫ ߸ ߡߍ߲ ߓߊ߯ ߊ߬ ߘߌߦߊ߫.
(17) ߘߍ߲߬ߞߣߍ߬ߦߊ߬ߓߊ߮ ߟߎ߫ ߏ߱ ߸ ߦߊ߬ߤߎ߯ߘߎ ߟߎ߫ ߏ߱ ߸ ߛߊߓߍ߲ߠߞߊ ߟߎ߫ ߏ߱ ߸ ߣߊ߬ߛߊ߯ߙߊ ߟߎ߫ ߏ߱ ߸ ߕߊ߫ ߓߊߕߏߟߊ ߟߎ߫ ߏ߱ ߸ ߊ߬ ߣߌ߫ ߛߏߡߊ ߟߎ߬ ، ߊߟߊ߫ ߘߌ߫ ߞߕߌ߫ ߏ߬ ߟߎ߬ ߕߍ߫ ߟߐ߬ߓߊ ߟߏ߲ ߠߋ߬ ߘߍ߯ ، ߓߊߏ߬ ߖߊ߯ߕߋ߬ ߸ ߊߟߊ߫ ߟߋ߬ ߞߏ ߓߍ߯ ߛߙߋ ߘߌ߫.
(18) ߌ ߡߴߊ߬ ߦߋ߫ ߓߊ߬ ߞߏ߫ ߝߋ߲ ߓߍ߯ ߟߋ߬ ߕߌ߲ߓߌߘߌ߲ ߞߍ߫ ߟߴߊߟߊ߫ ߦߋ߫ ߸ ߡߍ߲ ߦߋ߫ ߛߊ߲ ߠߎ߬ ߞߣߐ߫ ߸ ߊ߬ ߣߌ߫ ߡߍ߲ ߦߋ߫ ߘߎ߱ ߘߐ߫؟ ߊ߬ ߣߌ߫ ߕߋ߬ߟߋ ߣߌ߫ ߞߊߙߏ ߣߌ߫ ߟߏ߬ߟߏ ߟߎ߬ ߣߌ߫ ߞߎ߬ߙߎ ߟߎ߬ ߣߌ߫ ߦߙߌ ߟߎ߬ ߣߌ߫ ߓߌߦߊ߲ ߠߎ߬ ߸ ߊ߬ ߣߌ߫ ߡߐ߰ ߛߌߦߊߡߊ߲߫؟ ߞߏ߬ߣߌ߲߬ ߛߌߦߊߡߊ߲߫ ߝߣߊ߫ ߓߍ߫ ߸ ߖߊ߲߰ߞߕߊ ߟߋ߬ ߜߋ߲ߜߋ߲ߦߊߣߴߏ߬ ߟߎ߫ ߡߊ߬ ، ߊߟߊ߫ ߘߏ߲߬ ߓߊ߯ ߡߍ߲ ߘߐ߯ߦߊ߫ ߓߏ߲߬ߧߊ߬ߓߊ߯ ߕߴߏ߬ ߟߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߞߏ߫ ߟߋ߬ ߞߍ߫ ߟߊ߫ ߡߍ߲ ߓߊ߯ ߊ߬ ߘߌߦߊ߫.
(19) ߞߟߍ߬ߢߐ߲߰ߡߊ߫ ߝߌ߬ߟߊ߫ ߟߋ߫ ߣߌ߲߬ ߸ ߏ߬ ߟߎ߫ ߞߟߍ߬ߣߍ߲߫ ߊ߬ߟߎ߫ ߡߊ߰ߙߌ߬ ߞߏ ߟߋ߬ ߘߐ߫ ، ߡߍ߲ ߠߎ߬ ߞߍ߫ ߘߊ߫ ߓߊ߲߬ߓߊ߮ ߟߎ߬ ߘߌ߫ ߸ ߕߊ߫ ߝߊ߯ߣߌ߲ ߠߎ߫ ߟߋ߫ ߕߍ߰ߕߐ߫ ߏ߬ ߟߎ߬ ߦߋ߫ ߸ ߞߊ߬ ߕߏ߫ ߝߎߦߊߝߎߦߊ ߟߊߓߐ߲߬ ߠߴߊ߬ߟߎ߫ ߞߎ߲߬ߘߐ߫ ߞߍ߬ߣߍ߲.
(20) ߏ߬ ߘߴߊ߬ߟߎ߬ ߞߣߐߘߐ ߟߎ߫ ߦߋ߬ߟߋ߲߬ ߸ ߊ߬ ߣߴߊ߬ߟߎ߫ ߜߏ߬ߟߏ ߟߎ߬.
(21) ߣߍ߰ ߜߐ߲ߘߐ ߟߎ߬ ߝߣߊ߫ ߦߴߊ߬ߟߎ߬ ߞߊ߲ߡߊ߬ ( ߦߋ߲߬ ).
(22) ߊ߬ߟߎ߬ ߓߊ߯ ߊ߬ ߟߊߢߌߣߌ߲߫ ߞߏߕߊ߲߫ ߞߏ߫ ߊ߬ߟߎ߬ ߦߋ߫ ߓߐ߫ ߟߊ߫ ߦߋ߲߬ ߞߣߐߜߊ ߞߘߐ߫ ߸ ߊ߬ߟߎ߬ ߘߌ߫ ߟߊߛߊ߬ߦߌ߲߫ ߊ߬ ߘߐ߫ ߕߎ߲߯ߠߌ߲߫ ، ߞߏ߫ ߊߟߎ߫ ߦߋ߫ ߖߋ߬ߣߌ߲߬ߠߌ߲ ߖߊ߲߰ߞߕߊ ߡߊߜߏ߬ߙߏ߫ ߟߋ߬ ߕߘߋ߫.
(23) ߊߟߊ߫ ߦߋ߫ ߘߍ߲߬ߞߣߍ߬ߦߊ߬ߓߊ߯ ߢߌ߬ߡߊ߬ ߞߍ߬ߟߊ ߟߎ߫ ߟߋ߬ ߟߊߘߏ߲߬ ߠߊ߫ ߣߊߞߐ ߘߐ߫ ߸ ߖߌߢߊ ߟߎ߬ ߦߋ߫ ߥߦߏ߬ ߟߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ߞߎߟߊ߲ߞߎߟߊ߲߫ ، ߊ߬ߟߎ߬ ߦߋ߫ ߡߊߖߐ߯ߙߊ߲߫ ߠߊ߫ ߛߊߣߌ߲߫ ߜߊߙߊ߲ߜߊߙߊ߲ ߠߎ߬ ߟߊ߫ ߦߋ߲߬ ߸ ߊ߬ ߣߌ߫ ߟߓߊ߬ ߞߐߣߐ߲ ߠߎ߬ ߟߊ߫ ߸ ߊ߬ ߣߌ߫ ߞߵߊ߬ߟߎ߬ ߝߊߘߌߦߊߓߐ ߟߎ߬ ߞߍ߫ ߖߟߐߞߌ߫ ߜߊ߲߰ߛߊ߲ ߘߌ߫.
(24) ߓߊ ߏ߬ ߟߎ߬ ߞߊ߲ߘߊ߫ ߘߊ߫ ߞߎߡߊ߫ ߘߌߡߊ߲ ߠߋ߫ ߡߊ߬ ߸ ߊ߬ ߣߴߊ߬ߟߎ߬ ߞߊ߲ߘߊ߫ ߘߊ߫ ( ߡߊ߰ߙߌ߫ ) ߕߊ߲߬ߘߏ߬ߕߊ ߟߊ߫ ߛߌߟߊ ߟߋ߫ ߡߊ߬.
(25) ߡߍ߲ ߠߎ߫ ߣߵߊ߬ߟߎ߫ ߓߊ߲߬ ߠߊ߫ ߛߊ߫ ߸ ߊ߬ ߣߴߊ߬ߟߎ߬ ߦߋ߫ ߞߎ߬ߡߊ߲߬ߘߌ߬ߟߌ ߞߍ߫ ߟߴߊߟߊ߫ ߛߌߟߊ ߡߊ߬ ߸ ߊ߬ ߣߌ߫ ߡߌ߬ߛߙߌ߬ ߟߊߕߏߣߍ߲ ߝߣߊ߫ ߡߊ߬ ، ߊ߲ ߣߵߏ߬ ߡߍ߲ ߟߊߘߊ߲߫ ߠߊ߫ ߡߐ߱ ߟߎ߬ ߦߋ߫ ߸ ߞߊ߬ ߓߍ߯ ߞߢߴߊ߬ ߘߐ߫ ߖߐ߲: ߊ߬ ߘߊ߯ߡߊߞߍߓߊ߮ ߣߴߊ߬ ߡߊߜߍ߲ߓߊ߮ ߞߊ߬ߣߌ߲߫ ، ߝߋ߲-ߋ-ߝߋ߲߫ ߘߏ߲߬ ߞߊ߬ ߢߌߣߌ߲߫ ߘߐ߬ߝߊ߬ߙߊ߲߬ߛߊ߬ߟߌ ߡߊ߬ ߊ߬ ߘߐ߫ ߕߐ߬ߢߐ߮ ߟߊ߫ ߸ ߊ߲ ߘߴߏ߬ ߡߊߜߏ߬ߙߏ߫ ߖߊ߲߰ߞߕߊ߬ ߘߌߡߌ߲ߣߍ߲ ߠߊ߫.
(26) ߕߎ߬ߡߊ ߡߍ߲ ߊ߲ ߞߊ߬ ( ߊ߬ߟߋ߬ ) ߓߏ߲ ߦߙߐ ߦߌߘߊߞߊ߬ ߌߓߎ߬ߙߊ߬ߤߌߡߊ߫ ߟߊ߫ ߸ ߒ ߞߴߌ ߞߊߣߊ߬ ߝߏߦߌ߫ ߝߙߊ߬ ߒߠߋ ߡߊ߬ ߸ ߊ߬ ߣߴߌ ߦߋ߫ ߒ ߠߊ߫ ߓߏ߲ ߛߊߣߌ߲ߧߴߊ߬ ߖߊ߯ߟߋߓߊ߮ ߟߎ߬ ߦߋ߫ ، ߊ߬ ߣߴߊ߬ ߘߊߝߍ߫ ߟߐߓߊ߮ ߟߎ߬ ߦߋ߫ ، ߊ߬ ߣߌ߫ ߞߐߡߊߓߌߘߌ߲ߓߊ߮ ߣߌ߫ ߕߌ߲ߓߌߘߌ߲ߓߊ߮ ߟߎ߬ ߦߋ߫.
(27) ߊ߬ ߣߴߌ ߦߋ߫ ߞߟߋߞߟߋߡߊߦߟߍ ߞߍ߫ ߡߐ߱ ߟߎ߬ ߦߋ߫ ߡߊ߬ߓߊߕߏ ߟߊ߫ ، ߊ߬ߟߎ߬ ߘߌ߫ ߣߵߌ ߡߵߊ߬ߟߎ߫ ߛߋ߲߭ ߡߊ߬ ߸ ߊ߬ ߣߌ߫ ߢߐ߯ߡߍ߫ ߕߍߡߙߐߡߙߐߣߍ߲ ߘߊ߬ߡߊ ߞߊ߲߬ ، ߊ߬ߟߎ߬ ߘߌ߫ ߣߊ߬ ߞߙߎ߬ ߕߍ߬ߟߊ߬ ߛߌߟߊ߫ ߘߎ߲߫ ߜߊ߲߰ߛߊ ߝߍ߬.
(28) ߛߴߊ߬ߟߎ߬ ߘߌ߫ ߛߙߋߦߴߊ߬ߟߎ߬ ߡߎߣߊ߲ߝߊ߲߫ ߞߏ ߟߎ߫ ߡߊ߬ ، ߊ߬ ߣߴߊ߬ߟߎ߬ ߦߋ߫ ߊߟߊ߫ ߕߐ߮ ߝߐ߫ ߕߟߋ߬ ߡߊߟߐ߲ߣߍ߲ ߠߎ߬ ߞߘߐ߫ ߸ ߓߌߦߊ߲߫ ߞߟߏߝߋ߲ ߠߎ߫ ߡߊ߬ ߸ ‹ ߊߟߊ߫ › ߞߵߊ߬ߟߎ߫ ߤߊ߬ߙߌ߬ߖߍ߰ ߡߍ߲ ߠߎ߬ ߟߊ߫ ، ߊߟߎ߫ ( ߖߍ߬ߘߍ ) ߦߋ߫ ߘߏ߫ ߘߊߥߎ߲߫ ߏ߬ ߘߐ߫ ، ߊ߬ ߣߴߊߟߎ߫ ߦߋ߫ ߘߐ߰ߕߐ߫ ߓߟߏߞߏߟߏ߲ ߝߣߊ߫ ߟߘߊߥߎ߲ߠߌ߲߫.
(29) ‹ ߡߓߊ߬ߕߏ߬ߟߊ › ߟߎ߬ ߦߋ߫ ߓߊ߲߫ ߛߊ߫ ߞߵߊ߬ߟߎ߬ ߟߊ߫ ߣߐ߯ ߛߊߣߊ߲ ߠߎ߬ ߟߊߥߟߌ߬ ߸ ߞߵߊ߬ߟߎ߬ ߟߊ߫ ߘߊߞߊ߲ ߠߎ߬ ߝߊ߫ ߸ ߊ߬ ߣߴߊ߬ߟߎ߬ ߦߋ߫ ߖߊ߰ߟߋ ߞߍ߫ ߓߏ߲߫ ߞߘߐߞߘߐ ߡߊ߬.
(30) ߊ߬ ߘߏ߲߬ ߕߋ߲߬ ߠߋ߬ ، ߡߍ߲ ߞߏ߬ߣߌ߲ ߓߊ߯ ߊߟߊ߫ ߟߊ߫ ߞߏ߫ ߟߊߕߏߕߊ ߟߎ߬ ߡߊߓߏ߲߬ߧߊ߫ ߸ ߏ߬ ߟߋ ߘߌߡߊ߲߫ ߏ߬ ߟߴߊ߬ ߡߊ߰ߙߌ ߕߍ߰ߟߊ ߘߐ߫ ، ߓߌߦߊ߲ ߠߎ߫ ߘߏ߲߬ ߠߊߘߤߊ߬ߣߍ߲߫ ߠߋ߬ ߊߟߎ߫ ߦߋ߫ ߸ ߝߏ߫ ߡߍ߲ ߠߎ߬ ߦߋ߫ ߘߐߞߊ߬ߙߊ߲߬ ߠߴߊߟߎ߫ ߦߋ߫ ، ߒ߬ߓߵߊߟߎ߫ ߦߴߊߟߎ߫ ߡߊߓߐ߫ ߞߛߐ ߟߊ߫ ߸ ߣߊߟߌ߬ߡߎ߲߫ ߖߏ߭ ߟߎ߬ ߘߌ߫ ، ߊ߬ ߣߴߊߟߎ߫ ߦߴߊߟߎ߫ ߡߊߓߐ߫ ߥߎߦߊ߫ ߞߎߡߊ ߟߊ߫.
(31) ߊߟߎ߯ ߞߍ߫ ߖߐ߲ߖߐ߲ ߠߎ߫ ߟߋ߬ ߘߌ߫ ߊߟߊ߫ ߦߋ߫ ، ߊߟߎ߫ ߞߊߣߊ߬ ߞߍ߫ ߝߋ߲߫ ߝߙߊ߬ߓߊ߯ ߟߎ߫ ߘߌ߫ ߊ߬ ߡߊ߬ ߘߋ߬ ، ߡߍ߲ ߘߏ߲߬ ߓߊ߯ ߘߏ߫ ߝߙߵߊߟߊ߫ ߡߊ߬ ߸ ߊ߰ ߟߋ߬ ߦߴߏ߬ ߓߘߊ߫ ߔߙߏ߬ߞߕߏ߬ ߛߊ߲ ߡߊ߬ ߞߏ߫ ߊ߬ ߓߋ߬ߕߐ߫ ߸ ߏ߬ ߞߍ ߞߐ߬ߣߐ ߟߎ߫ ߞߵߏ ߖߊ߬ߛߏ߲߬ ߔߌߎ߫ ߸ ߥߟߊ߫ ߝߢߐ ߞߊ߬ ߥߴߊ߬ ߟߊߓߋ߬ ߦߌߟߊ߫ ߖߊ߲߫.
(32) ߊ߬ ߘߏ߲߬ ߕߋ߲߬ ߠߋ߬ ، ߡߍ߲ ߞߏ߬ߣߌ߲߬ ߓߊ߯ ߊߟߊ߫ ߘߎ߲߬ߘߎ߬ߡߊ߬ ߤߊߘߌߦߊ ߟߎ߬ ߞߍ߫ ߓߟߋ߬ߓߟߋ ߟߎ߬ ߘߌ߫ ߸ ߒ߬ߓߊ߬ ߏ߬ ߟߎ߬ ߦߋ߫ ߛߣߐ߬ߡߍ ߟߎ߬ ߟߊ߫ ߝߊ߲ߕߊ߲ߞߟߊ ߘߏ߫ ߟߋ߬ ߘߌ߫.
(33) ߡߎߣߊ߲ߝߊ߲߫ ߠߎ߫ ߠߋ߬ ߊߟߎ߫ ߦߋ߫ ߓߌߦߊ߲ ߠߎ߬ ߘߐ߫ ߸ ߝߏ߫ ߞߵߊ߬ ߛߌ߰ ߛߕߊ߫ ߟߐ߯ߟߊߣߍ߲ ߠߊ߫ ߸ ߊ߬ ߣߌ߫ ߝߣߊ߫ ߞߊ߬ ߛߴߊ߬ߟߎ߬ ( ߤߊߘߌߦߊߟߡߊ ) ߟߊߛߋ߫ ߦߌߟߊ ߸ ߣߊߟߌ߬ߡߎ߲߬ ߓߏ߲߫ ߞߘߐߞߘߐ ߘߌ߫.
(34) ߊ߲ ߞߊ߬ ߖߋ߬ߟߌ߬ ߓߐ߲߬ ߦߙߐ߫ ߟߋ߬ ߞߍ߫ ߡߊ߲߬ߕߏ߲ ߓߍ߯ ߦߋ߫ ߸ ߛߴߊ߬ߟߎ߬ ߘߴߊߟߊ߫ ߕߐ߮ ߝߐ߫ ߝߋ߲߫ ߡߊ߬ ߊ߬ ߞߵߊ߬ߟߎ߫ ߤߊ߬ߙߌ߬ߖߍ߰ ߡߍ߲ ߠߊ߫ ߓߌߦߊ߲߫ ߞߟߏߝߋ߲ ߠߎ߬ ߘߐ߫ ، ߊߟߎ߫ ߘߏ߲߬ ߓߍ߯ ߡߊ߰ߙߌ ߦߋ߫ ߡߊ߰ߙߌ߬ ߞߋߟߋ߲߫ ߔߋ߫ ߟߋ߬ ߘߌ߫ ، ߒ߬ߓߵߊߟߎ߫ ߦߴߊߟߎ߫ ߖߘߍ߬ߞߟߴߏ߬ ߟߋ ߦߋ߫ ߞߎߙߍ߫ ، ߊ߬ ߣߴߌߟߋ ߦߴߌ ߘߟߊߝߎ߬ ߖߘߍ߬ߡߊ߬ߖߌ߰ߟߊ ߟߎ߬ ߦߋ߫.
(35) ߊߟߊ߫ ߓߊ߯ ߞߏߝߐ߫ ߸ ߏ߬ ߟߎ߫ ߟߋ߫ ߛߣߐ߬ߡߍ ߟߎ߬ ߦߋ߫ ߛߌߟߊ߲߫ ߠߊ߫ ߸ ߊ߬ ߣߴߏ߬ ߟߎ߫ ߟߴߊ߬ߟߎ߫ ߡߎ߬ߢߎ߲߬ ߠߊ߫ ߕߙߐߦߊ ߡߊ߬ ߸ ߡߍ߲ ߓߊ߯ ߊ߬ߟߎ߫ ߛߐ߬ߘߐ߲߬ ، ߏ߬ ߟߎ߫ ߟߋ߬ ߛߊߟߌ ߟߐ߬ ߟߊ߫ ߸ ߊ߬ ߣߴߊ߲ ߞߵߊ߬ߟߎ߫ ߤߊ߬ߙߌ߬ߖߍ߰ ߝߋ߲ ߡߍ߲ ߠߊ߫ ߸ ߊ߬ߟߎ߬ ߦߋ߫ ߖߘߍ߬ߡߊ߬ߓߐ ߞߍ߫ ߟߴߏ߬ ߘߐ߫.
(36) ߢߐ߯ߡߍ߫ ߡߐߣߍ ߟߎ߬ ߸ ߊ߲ ߞߵߏ߬ ߟߎ߬ ߞߍ߫ ߊߟߎ߫ ߦߋ߫ ߊߟߊ߫ ߘߎ߲߬ߘߎ߬ߡߊ߬ ߝߋ߲ ߠߎ߬ ߘߏ߫ ߟߎ߫ ߟߋ߬ ߘߌ߫ ، ߊߟߎ߫ ߟߊ߫ ߤߙߊ߫ ߟߴߏ߬ ߟߎ߬ ߘߐ߫ ، ߊߟߎ߫ ߦߋ߫ ߊߟߊ߫ ߕߐ߮ ߝߐ߫ ߊ߬ߟߎ߫ ߡߊ߬ ߸ ߞߵߊ߬ߟߎ߫ ߟߐ߬ߣߍ߲ ߕߏ߫ ߊ߬ߟߎ߫ ߛߋ߲߬ ߛߊ߬ߓߊ ߞߎ߲߬ߘߐ߫ ، ߒ߬ߓߊ߬ ߣߴߊ߬ ߝߊ߰ ߘߊ߫ ߛߊ߫ ߞߵߊ߬ ߟߴߊ߬ ߝߊ߲߬ ߞߋߟߋ߲ ߞߊ߲߬ ߸ ߊߟߎ߫ ߦߋ߫ ߘߏ߫ ߘߊߥߎ߲߫ ߊ߬ߟߎ߬ ߘߐ߫ ߸ ߊ߬ ߣߴߊߟߎ߫ ߦߋ߫ ߕߙߊߟߌߟߊ ߣߌ߫ ߢߊߖߎ߯ߦߟߊ ߟߘߊߥߎ߲ߠߌ߲߫ ߊ߬ߟߎ߬ ߘߐ߫ ߸ ߊ߲ ߣߵߊ߬ߟߎ߬ ߞߟߏ߫ ߟߴߊߟߎ߫ ߦߋ߫ ߕߋ߲߬ ߠߋ߬ ߸ ߛߴߊߟߎ߫ ߘߌ߫ ߞߏߢߌߡߊߟߐ߲ ߞߍ߫.
(37) ߊ߬ߟߎ߫ ߛߏ߬ߓߏ ߟߎ߬ ߣߴߊ߬ߟߎ߫ ߖߋ߬ߟߌ ߟߎ߬ ߕߍ߫ ߊߟߊ߫ ߛߐ߬ߘߐ߲߬ ߠߊ߫ ، ߓߊ߬ߙߌ߬ ߝߊ߲ߕߊ߲ߞߊ ߡߍ߲ ߝߘߊߕߐ߫ ߊߟߎ߫ ߟߊ߫ ߸ ߏ߬ ߟߋ ߊߟߊ߫ ߛߐ߬ߘߐ߲߬ ߠߊ߫ ، ߊߟߊ߫ ߞߵߊ߬ߟߎ߬ ߞߟߏ߫ ߊߟߎ߫ ߦߋ߫ ߕߋ߲߬ ߠߋ߬ ߸ ߛߴߊߟߎ߫ ߘߌ߫ ߊߟߊ߫ ߟߊ߫ ߓߏ߲߬ߧߊ ߟߊߥߊ߲߬ߞߊ߫ ‹ ߘߌ߯ߣߊ › ߡߊ߬ ߸ ߊ߬ ߞߵߊߟߎ߫ ߞߊ߲ߘߊ߫ ߡߍ߲ ߡߊ߬ ߸ ߊ߬ ߣߴߌߟߋ ߦߴߌ ߘߟߊߝߎ߬ ߢߊ߬ߓߊ߮ ߟߎ߬ ߦߋ߫.
(38) ߖߊ߯ߕߋ߬ ߸ ߊߟߊ߫ ߟߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߡߊߞߊ߲ߞߊ߲߫ ߠߊ߫ ، ߊߟߊ߫ ߘߏ߲߬ ߕߍ߫ ߖߊ߲߬ߝߊ߬ߒߕߋ߫ ߝߌߕߙߌߥߊߟߋ߫ ߛߌ߫ ߞߊ߬ߣߌ߲߬ ߠߊ߫.
(39) ߊ߬ߟߎ߬ ߦߋ߫ ߡߍ߲ ߠߎ߫ ߞߟߍ߬ ߟߊ߫ ߸ ߘߌ߬ߢߍ߬ ߓߘߊ߫ ߞߍ߫ ߏ߬ ߟߎ߬ ߦߋ߫ ( ߕߊߢߐ߲߯ߓߐ ߘߐ߫ ) ߸ ߓߊ ߊ߬ߟߎ߫ ߕߐ߬ߢߍ߰ߣߍ߲߫ ߠߋ߬ ، ߊߟߊ߫ ߘߏ߲߬ ߘߌ߫ ߛߴߊ߬ߟߎ߫ ߘߍ߬ߡߍ߲߬ ߠߊ߫.
(40) ߏ߬ ߟߎ߫ ߟߋ߬ ߟߊߓߐߣߴߊ߬ߟߎ߬ ߟߊ߫ ߟߎ ߟߎ߬ ߞߣߐ߫ ߕߎ߬ߢߊ߫ ߕߣߊ߬ ߟߊ߫ ، ߝߏ߫ ߊ߬ߟߎ߫ ߣߵߊ߬ ߝߐ ߡߍ߲ ߞߍ߫ ߟߊ߫ ߞߏ߫ ߊ߲ ߡߊ߰ߙߌ ߟߋ߬ ߊߟߊ߫ ߘߌ߫. ߣߌ߫ ߊߟߊ߫ ߕߎ߲߬ ߡߊ߫ ߡߐ߱ ߘߏ߫ ߞߍ߫ ߞߊ߬ ߘߏ߫ ߟߊߢߐ߬ߣߌ߲߫ ߸ ߓߊ߬ߕߏ ߘߊ߯ߡߊߞߍ߫ ߦߙߐ ߟߎ߫ ߕߎ߲߬ ߘߌ߫ ߕߋ߬ ، ߊ߬ ߣߌ߫ ߢߐ߲߬ߞߌ߲߬ߘߊ ߟߎ߬ ߣߌ߫ ߘߍ߬ߓߏ߲ ߠߎ߬ ߸ ߊ߬ ߣߌ߫ ߕߌ߲ߓߌߘߌ߲߫ ߦߙߐ ߟߎ߬ ߸ ߊߟߊ߫ ߕߐ߮ ߝߐ߫ ߞߏ߫ ߛߌߦߊߡߊ߲ ߘߌ߫ ߞߍ߫ ߦߙߐ-ߐ-ߦߙߐ߫ ߘߐ߫ ߞߊ߬ߣߌ߲߫ ، ߒ߬ߞߵߊߟߊ߫ ߘߌߣߊ߬ ߡߐ߰ ߘߍ߬ߡߍ߲߬ ߖߐ߫ ߸ ߡߍ߲ ߦߴߊ߬ ߘߍ߬ߡߍ߲߬ ߠߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߝߊ߲߬ߞߊ߬ߡߊ߫ ߣߌ߬ߣߌ߬ߟߊ ߟߋ߬ ߘߌ߫.
(41) ߡߍ߲ ߠߎ߬ ߞߴߏ߬ ߘߌ߫ ߸ ߣߴߊ߲ ߞߵߏ߬ ߟߎ߬ ߡߝߊ߫ ߘߎ߱ ߞߊ߲߬ ߸ ߊ߬ߟߎ߬ ߘߌ߫ ߛߊߟߌ ߟߐ߬ ߞߊ߬ ߖߞߊ ߘߌ߫ ߸ ߞߊ߬ ߖߡߊ߬ߙߌ߬ߟߌ ߞߍ߫ ߢߌ߬ߡߊ ߟߊ߫ ߸ ߊ߬ ߣߌ߫ ߞߊ߬ ߝߊߕߊ߲ߕߟߌ ߞߍ߫ ߖߎ߯ߡߊ߲ ߡߊ߬. ߊߟߊ߫ ߟߋ߬ ߘߏ߲߬ ߕߊ߫ ߦߋ߫ ߞߏ ߟߎ߫ ߞߎ߲߬ߘߏ߲ ߘߌ߫.
(42) ߣߴߊ߬ߟߎ߫ ߞߵߌ ߛߐ߬ߛߐ߬ ߸ ߣߎ߯ߤߎ߲߫ ߡߌ߬ߙߌ߲߬ߘߌ ߣߌ߫ ߊ߯ߘߌ ߟߎ߬ ߣߌ߫ ߛߊ߬ߡߎ߯ߘߊ ߟߎ߬ ߓߍ߯ ߞߊ߬ ߡߊ߬ߛߐ߬ߛߐ߬ߟߌ ߞߍ߫ ߢߌ߲߬ ߠߎ߬ ߢߍ߫ ߞߘߐ߬ߡߊ߲߫.
(43) ߊ߬ ߣߴߌߓߎ߬ߙߊ߬ߤߌߡߊ߫ ߡߌ߬ߙߌ߲߬ߘߌ ߣߌ߫ ߟߎ߯ߕߌ߫ ߡߌ߬ߙߌ߲߬ߘߌ.
(44) ߊ߬ ߣߌ߫ ߡߊߘߌ߬ߦߣߊ߫ ߘߏ߲߬ߞߏ ߟߎ߬ ، ߡߎߛߊ߫ ߝߣߊ߫ ߛߐ߬ߛߐ߬ ߘߊ߫ ، ߓߊ߬ߙߌ߬ ߒ ߞߊ߬ ߓߊ߲߬ߓߊ߮ ߟߎ߫ ߘߏ߲߰ߘߌ߫ ߡߎߣߎ߲߬ ߸ ߒ ߓߊ߲߫ ߘߊ߫ ߞߵߊ߬ߟߎ߬ ߕߍ߯ߕߊ߬ ߡߍ߲ߞߍ߭ ߸ ߒ ߠߊ߫ ߖߊ߲߬ߞߌ߬ߟߌ ߞߍ߫ ߘߊ߫ ߘߌ߬؟.
(45) ߊ߲ ߓߘߊ߫ ߛߏ߫ ߖߋ߬ߟߌߖߋ߬ߟߌ߫ ߟߋ߬ ߛߌߟߊߛߊ߬ ߞߵߊ߬ߟߎ߬ ߕߏ߫ ߕߐ߬ߢߍ߮ ߟߊ߫؟ ߸ ( ߛߏ ) ߏ߬ ߟߎ߫ ߓߋ߬ߣߍ߲ ߦߴߊ߬ߟߎ߬ ߓߟߌ ߟߎ߫ ߞߊ߲߬ ، ߊ߬ ߣߌ߫ ߞߐ߬ߟߐ߲߫ ߖߋ߬ߟߌߖߋ߬ߟߌ߫ ߟߋ߬ ߟߊߞߏߟߏ߲ ߦߋ߫؟ ߊ߬ ߣߌ߫ ߛߊ߲ߞߊߛߏ߫ ߞߘߐߕߊ߬ߣߍ߲߫ ߖߋ߬ߟߌߖߋ߬ߟߌ߫ ߓߋ߬ߣߍ߲ ߦߋ߫؟.
(46) ߦߊ߯ߟߴߊ߬ߟߎ߬ ߕߍ߫ ߘߎ߱ ߦߊ߯ߟߊ߫ ߟߊ߫ ߓߊ߬؟ ߸ ߛߊ߫ ߛߣߐ߬ߡߍ߬ ߟߎ߫ ߘߌ߫ ߞߍ߫ ߊ߬ߟߎ߬ ߟߊ߫ ߸ ߊ߬ߟߎ߬ ߘߌ߫ ߤߊ߲ߞߟߌߡߦߊ߫ ߡߍ߲ ߠߎ߬ ߟߊ߫ ߸ ߞߊ߬ ߕߟߏ߫ ߟߎ߫ ߞߍ߫ ߊ߬ߟߎ߬ ߟߊ߫ ߸ ߊ߬ߟߎ߬ ߘߌ߫ ߡߍ߲ߠߌ߲߫ ߞߍ߫ ߡߍ߲ ߠߎ߬ ߟߊ߫؟ ، ߒ߬ߓߊ߬ ߢߊ ߟߎ߬ ߕߍ߫ ߝߎߦߋ߲ߧߊ߫ ߟߊ߫ ߘߋ߬ ، ߓߊ߬ߙߌ߬ ߛߣߐ߬ߡߍ ߟߎ߫ ߟߋ߬ ߝߎߦߋ߲ߧߊ߫ ߟߊ߫ ߡߍ߲ ߠߎ߬ ߦߋ߫ ߛߌߛߌ ߟߎ߬ ߘߐ߫.
(47) ߊ߬ߟߎ߬ ߦߋ߫ ߞߙߐߕߐ߫ ߟߴߌߟߋ ߟߊ߫ ߸ ߖߊ߲߰ߞߕߊ ߟߊߣߊ߭ ߟߊ߫ ، ߊߟߊ߫ ߘߏ߲߬ ߕߍ߫ ߊ߬ ߟߊ߫ ߛߘߊߒߡߊߞߊ߲ߠߊ ߝߘߏ߬ ߟߊ߫ ، ߟߏ߲߫ ߞߋߟߋ߲ ߦߴߌ ߡߊ߰ߙߌ ߓߘߊ ߟߋ߬ ߸ ߦߏ߫ ߊߟߎ߫ ߟߊ߫ ߛߊ߲߬ ߦߙߌߞߕߊ ߥߊ߯ ߞߋߟߋ߫.
(48) ߛߏ߫ ߖߋ߬ߟߌߖߋ߬ߟߌ߫ ߟߋ߬ ߸ ߊ߲ ߓߘߊ߫ ߡߍ߲ ߘߏ߲߰ߘߌ߫ ߞߵߊ߬ ߕߏ߫ ߕߐ߬ߢߍ߮ ߟߊ߫؟ ߊ߲ ߣߊ߬ ߘߊ߫ ߓߊ߲߫ ߞߵߏ߬ ߕߍ߯ߕߊ߬ ߥߊߡߌ߲߫ ، ‹ ߓߍ߯ › ߘߏ߲߬ ߟߊߓߊ߲ߕߐ߫ ߒߠߋ ߟߋ߫ ߡߊ߬.
(49) ߊ߬ ߝߐ߫ ߞߏ߫ ߤߍ߲߬ ߊߟߎ߬ ߡߐ߱ ߟߎ߬ ߸ ߒߠߋ ߦߴߊߟߎ߫ ߦߋ߫ ߖߊ߬ߛߙߋ߬ߡߊ߬ߟߌ߬ߟߊ߬ ߘߐ߬ߜߍ߫ ߟߋ߬ ߘߌ߫ ߘߋ߬.
(50) ߡߍ߲ ߠߎ߫ ߘߏ߲߬ ߓߊ߯ ߘߍ߲߬ߞߣߍ߬ߦߊ߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߏ߬ ߟߎ߬ ߢߍߛߌ߰ߣߍ߲߫ ߦߊ߬ߝߊ ߣߌ߫ ߤߊ߬ߙߌ߬ߖߍ߰ ߞߟߊߒߞߋ߫ ߟߋ߬ ߟߊ߫.
(51) ߒ߬ߓߊ߬ ߡߍ߲ ߠߎ߫ ߟߋ߬ ߓߊ߯ ߕߌߙߌ߲ߠߌ߲ ߞߍ߫ ߒ߬ ߠߊ߫ ߟߝߊߙߌ ߟߎ߬ ߞߊ߲ߡߊ߬ ߒ߬ ߠߊ߫ ߞߏ߬ߙߌ߬ ߞߊ߲ ߡߊ߬ ، ߏ߬ ߟߎ߫ ߟߋ߬ ߥߋ߲߯ߓߋ ߘߏ߲߬ߞߏ ߟߎ߬ ߘߌ߫.
(52) ߊ߲ ߡߊ߫ ߞߋߟߊߡߐ߯ ߣߌ߫ ߟߊ߬ߝߐ߬ߓߊ߰ ߛߌ߫ ߗߋ߫ ߌߟߋ ߢߍ߫ ߞߘߐ߬ߡߊ߲߫ ߸ ߝߴߏ߬ ߓߊ߯ ߞߍ߫ ߞߊ߬ߙߊ߲ ߠߊ߬ ߸ ߜߍ߬ߘߍ ߦߋ߫ ߘߏ߫ ߟߊߝߌ߬ߟߌ߫ ߏ߬ ߟߊ߫ ߞߊ߬ߙߊ߲ ߘߐ߫ ߔߙߊߎ߫ ، ߒ߬ߞߵߊߟߊ߫ ߟߋ߫ ߜߍ߬ߘߍ ߕߊ߫ ߟߊߝߟߌ߬ߣߍ߲ ߏ ߕߍ߬ ߟߊ߫ ߸ ߞߊ߬ ߓߊ߲߫ ߞߵߊ߬ ߟߊ߫ ߟߝߊߙߌ ߟߎ߬ ߘߐߓߍ߲߬ ، ߓߊ ߸ ߊߟߊ߫ ߦߋ߫ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫.
(53) ( ߊߟߊ߫ ߏ߬ ߟߊߥߟߌ߬ ߟߊ߫ ߟߋ߬ ) ߛߴߊ߬ ߘߌ߫ ߜߍ߬ߘߍ ߕߊ߫ ߟߊߝߟߌ߬ߣߍ߲ ߞߍ߫ ߞߘߐߓߐߟߌ߫ ߘߌ߫ ߛߣߐ߬ߡߍ߫ ߖߌ߰ߙߌ߬ߖߐ߰ߙߐ߬ߕߐ ߟߎ߬ ߣߌ߫ ߖߛߎ߬ ߖߊ߬ߓߊ߰ߕߐ ߟߎ߬ ߦߋ߫ ، ߒ߬ߓߊ߬ ߕߐ߬ߢߍ߰ߒߕߋ ߟߎ߬ ߛߊ߫ ߸ ߏ߬ ߟߎ߫ ߟߋ߫ ߛߐ߬ߛߐ߬ߟߌ߫ ߘߐ߫ ߡߍ߲ ߦߴߊ߬ߟߎ߬ ߦߙߐߡߊߖߊ߲߬ߧߊ߬ ߟߊ߫ ( ߢߐ߲߮ ߠߊ߫ ).
(54) ߊ߬ ߣߌ߫ ߝߣߊ߫ ߸ ߡߍ߲ ߠߎ߬ ߛߐߣߍ߲߫ ߟߐ߲ߠߌ߲ ߠߊ߫ ߸ ߛߴߏ߬ ߟߎ߬ ߘߴߊ߬ ߟߐ߲߫ ߸ ߞߏ߫ ‹ ߞߎ߬ߙߊ߬ߣߊ › ߦߋ߫ ߕߎ߬ߢߊ߫ ߟߋ߬ ߘߌ߫ ߞߊ߬ ߝߊߘߴߌ ߡߊ߰ߙߌ ߟߊ߫ ، ߏ߬ ߓߊ߯ ߞߍ߫ ߊ߬ߟߎ߬ ߘߌ߫ ߘߍ߲߬ߞߣߍ߬ߦߴߊ߬ ߡߊ߬ ߞߵߊ߬ߟߎ߫ ߖߎ߬ߛߎ ߟߎ߬ ߞߟߏ߫ ߊ߬ ߦߋ߫ ، ߊߟߊ߫ ߟߋ߫ ߘߏ߲߬ ߦߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߞߊ߲ߘߊߓߊ߮ ߘߌ߫ ߛߌߟߊ߫ ߕߋߟߋ߲ߣߍ߲ ߞߊ߲߬.
(55) ߓߊ߲߬ߓߊ߮ ߟߎ߬ ߕߍߣߊ߬ ߓߐ߫ ߟߊ߫ ߛߌߞߊ ߘߐ߫ ߊ߬ ߞߏߢߊ ߘߐ߫ ߝߋߎ߫ ߸ ߝߏ߫ ߣߌ߫ ߟߐ߬ߓߊ ߣߊ߬ ߘߊ߫ ߓߊ߬ߙߴߊ߬ߟߎ߬ ߘߐ߫ ߸ ߥߟߊ߫ ߟߏ߲߫ ߜߍߟߍ߲ ߘߏ߫ ߖߊ߲߰ߞߕߊ ߦߋ߫ ߣߊ߬ ( ߥߎ߬ߦߊ߫ ) ߊ߬ߟߎ߫ ߞߊ߲߬.
(56) ߏ߬ ߟߏ߲ ߡߊ߲߬ߛߊ߬ߦߊ ߊߟߊ߫ ߟߋ߬ ߕߊ߫ ߘߌ߫ ، ߊ߬ ߘߏ߲߬ ߘߌ߫ ߞߕߌ߫ ߓߍ߯ ߕߍ߫ ، ߡߍ߲ ߠߎ߬ ߓߊ߯ ߕߍ߬ߘߍ߫ ߘߍ߲߬ߞߣߍ߬ߦߊ߬ߓߊ߯ ߢߌ߬ߡߊ߬ ߞߍ߬ߟߊ ߟߎ߬ ߘߌ߫ ߸ ߏ߬ ߟߎ߬ ߦߋ߫ ߣߍߡߊ ߣߊߞߐ ߟߎ߫ ߟߋ߬ ߘߐ߫.
(57) ߒ߬ߓߊ߬ ߡߍ߲ ߠߎ߫ ߣߵߊ߬ߟߎ߫ ߓߊ߲߬ ߠߊ߫ ߸ ߊ߬ ߣߴߊ߬ߟߎ߫ ߞߊ߬ ߒ߬ ߠߊ߫ ߟߝߊߙߌ ߟߎ߬ ߡߊߛߐ߬ߛߐ߬ ߸ ߏ߬ ߟߎ߫ ߟߋ߬ ߢߍߛߌ߰ߣߍ߲߬ ߘߐ߯ߦߊ ߖߊ߲߰ߞߕߊ ߟߊ߫.
(58) ߡߍ߲ ߠߎ߫ ߞߏ߬ߣߌ߲߬ ߝߎ߲ߘߌ߫ ߘߴߊߟߊ߫ ߛߌߟߊ ߘߐ߫ ߸ ߞߊ߬ ߓߊ߲߫ ߞߵߊ߬ߟߎ߫ ߝߊ߰ ، ߥߟߊ߫ ߞߵߊ߬ߟߎ߫ ߛߊ߬ ߸ ߊߟߊ߫ ߘߌ߫ ߣߵߏ߬ ߟߎ߫ ߤߊ߬ߙߌ߬ߖߍ߯ ߤߊ߬ߙߌ߬ߖߍ߰ ߓߘߍߓߘߍ ߟߊ߫ ، ߊߟߊ߫ ߟߋ߫ ߘߏ߲߬ ߦߋ߫ ߤߊ߬ߙߌ߬ߖߍ߰ߟߊ ߟߎ߬ ߘߐ߫ ߢߌ߬ߡߊ ߘߌ߫.
(59) ߊ߬ ߘߴߏ߬ ߟߎ߬ ߟߊߘߏ߲߬ ߦߙߐ߫ ߘߐ߫ ߸ ߊ߬ߟߎ߬ ߘߌ߫ ߘߌ߬ߢߍ߬ ߡߍ߲ ߡߊ߬ ، ߖߊ߯ߕߋ߬ ߸ ߊߟߊ߫ ߟߋ߬ ߟߐ߲ߠߌ߲ߠߊ߫ ߡߎ߬ߢߎ߲߬ߓߊ߮ ߘߌ߫.
(60) ߊ߰ ߕߋ߲߬ ߠߋ߬ ߸ ߡߍ߲ ߓߊ߯ ߊ߬ ߕߊߢߐ߲߯ߓߐ߫ ߞߏ߫ ߘߐ߫ ߸ ߡߍ߲ ߢߐ߲߰ ߟߊ߫ ߘߴߊ߬ ߞߊ߲߬ ، ߓߊ߰ ߣߊ߬ ߘߊ߫ ߞߍ߫ ߏ ߡߊ߬ ߕߎ߲߯ߠߌ߲߫ ߸ ߊߟߊ߫ ߘߴߏ߬ ߘߍ߬ߡߍ߲߫ ߠߋ߬ ߘߍ߯ ، ߖߊ߯ߕߋ߬ ߸ ߊߟߊ߫ ߦߋ߫ ߜߊ߲ߒߞߎ߲ߠߟߊ߫ ߘߌ߫ ߸ ߊ߬ ߦߋ߫ ߦߝߊ߬ߟߊ߫ ߘߌ߫.
(61) ߏ߬ ߦߋ߫ ߕߋ߲߬ ߠߋ߬ ߸ ߓߊߏ߬ ߊߟߊ߫ ߟߋ߬ ߛߎ ߟߊߘߏ߲߬ ߠߊ߫ ߕߟߋ߬ߘߐ߬ߟߊ ߘߐ߫ ߸ ߊ߬ ߘߌ߫ ߕߟߋ߬ߘߐ߬ߟߊ ߝߣߊ߫ ߟߊߘߏ߲߬ ߛߎ ߘߐ߫ ، ߊ߬ ߣߌ߫ ߖߊ߯ߕߋ߬ ߸ ߊߟߊ߫ ߟߋ߬ ߡߍ߲ߠߌ߲ߠߊ߫ ߦߋߟߌߟߊ ߘߌ߫.
(62) ߏ߬ ߟߴߊ߬ ߦߌ߬ߘߊ߬ ߟߊ߫ ߸ ߞߏ߫ ߊߟߊ߫ ߟߋ߫ ߕߎ߬ߢߊ ߘߌ߫ ، ߊ߬ ߣߌ߫ ߞߏ߫ ߊߟߎ߫ ߦߋ߫ ߝߋ߲ ߡߍ߲ ߓߊ߬ߕߏ߬ ߟߊ߫ ߞߵߊߟߊ߫ ߕߏ߫ ߸ ߏ߬ ߟߋ ߡߣߊ߬ߡߣߊ ߘߌ߫ ، ߊ߬ ߣߌ߫ ߖߊ߯ߕߋ߬ ߸ ߊߟߊ߫ ߟߋ߬ ߔߏ߲ߞߌ߲ ߘߌ߫ ߸ ߊ߬ߟߋ ߟߋ߫ ߘߊ߲߬ߞߙߐ߬ߓߊ ߘߌ߫.
(63) ߌ ߡߴߊ߬ ߦߋ߫ ߓߊ߬ ߞߏ߫ ߊߟߊ߫ ߟߋ߬ ߖߌ ߟߊߖߌ߰ ߟߊ߫ ߞߊ߬ ߓߐ߫ ߡߐ߲ߕߐ߲ ߘߐ߫߹ ߸ ߏ߬ ߓߊ߯ ߞߍ߫ ߘߎ߱ ߘߌ߫ ߟߊߝߙߌߛߌߦߊ߫ ߛߌ߲߯ ، ߖߊ߯ߕߋ߬ ߸ ߊߟߊ߫ ߟߋ߬ ߡߐ߯ߡߐ߯ߒߕߋ߫ ߞߟߊ߬ߡߊ߬ߓߊ߮ ߘߌ߫.
(64) ߊ߬ ߕߊ ߟߋ߬ ߛߊ߲ ߠߎ߬ ߞߣߐ߫ ߝߋ߲ ߣߌ߫ ߘߎ߱ ߞߣߐ߫ ߝߋ߲ ߘߌ߫ ، ߊ߬ ߣߌ߫ ߖߊ߯ߕߋ߬ ߸ ߊߟߊ߫ ߟߋ߬ ߞߊ߯ߙߌߓߊ߯ ߕߊ߲߬ߘߏ߬ߕߊ ߘߌ߫.
(65) ߌ ߡߴߊ߬ ߦߋ߫ ߓߊ߬ ߞߏ߫ ߊߟߊ߫ ߟߋ߫ ߞߊ߬ ߘߎ߱ ߝߋ߲ ( ߓߍ߯ ) ߞߟߏ߫ ߊߟߎ߫ ߦߋ߫؟ ߸ ߊ߬ ߞߊ߬ ߞߎߟߎ߲ ߝߣߊ߫ ߞߟߏ߫ ߸ ߏ߬ ߦߋ߫ ߞߎߟߎ߲ߞߎߟߎ߲߫ ߠߊ߫ ߓߊ ߞߊ߲߬ ߊ߬ ߟߊ߫ ߖߊ߬ߡߊߙߌ ߟߊ߫ ، ߊ߬ߟߋ ߟߋ߬ ߛߊ߲ ߘߐߡߌ߬ߘߊ߬ ߟߊ߫ ߸ ߊ߬ ߞߊߣߊ߬ ߓߋ߬ ߘߎ߱ ߞߊ߲߬ ߸ ߝߏ߫ ߊ߬ ߟߊ߫ ߘߌ߬ߢߍ ߟߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߞߌ߬ߣߌ߲߬ߞߌ߬ߣߌ߲߬ ߠߊ߫ ߘߌ߫ ߸ ߊ߬ ߦߋ߫ ߤߌߣߟߊ߫ ߘߌ߫ ߡߐ߱ ߟߎ߬ ߟߊ߫.
(66) ߊ߬ߟߋ ߟߋ߫ ߞߵߊߟߎ߫ ߟߊߣߌߡߦߊ߫ ߸ ߊ߬ ߘߌߣߊ߬ ߓߊ߲߫ ߞߵߊߟߎ߫ ߛߊ߬ ߸ ߊ߬ ߘߌߣߊ߬ ߓߊ߲߫ ߕߎ߲߯ ߞߵߊߟߎ߫ ߟߊߣߌߡߦߊ߫ ، ߞߏ߬ߣߌ߲߬ ߖߊ߯ߕߋ߬ ߸ ߡߐ߱ ߦߋ߫ ߝߌߕߙߌߥߊߟߋ ߟߋ߬ ߘߌ߫.
(67) ߊ߲ ߞߊ߬ ߓߊ߬ߕߏ߬ ߢߊ߫ ߟߋ߬ ߘߌ߫ ߡߊ߲߬ߕߏ߲ ߞߋ߬ߟߋ߲߬ߞߋ߬ߟߋ߲߬ߣߊ ߡߊ߬ ߸ ߓߍ߯ ߊ߬ ߕߊ߫ ߓߊ߬ߕߏ ߏ߬ ߞߍ߫ ߟߊ߫ ، ߏ߬ ߘߐ߫ ߸ ߊ߬ߟߎ߬ ߞߊߣߵߌ ߘߊߘߐߖߊ߬ ( ߞߊ߲ߠߊߕߍ߯ߟߌ ) ߞߏߢߊ ߘߐ߫ ، ߌߟߋ ߞߏ߬ߣߌ߲ ߦߋ߫ ߞߟߌߟߌ ߞߴߌ ߡߊ߰ߙߌ ߟߋ߫ ߡߊ߬ ، ߖߊ߯ߕߋ߬ ߸ ߌ ߦߋ߫ ߞߊ߲ߘߦߊ߫ ߕߋߟߋ߲ߣߍ߲߫ ߠߋ߬ ߞߊ߲߬.
(68) ߣߴߊ߬ߟߎ߫ ߘߏ߲߬ ߞߵߌ ߘߊߘߐߖߊ߬ ߸ ߌ ߦߴߊ߬ ߝߐ߫ ߞߏ߫ ߊߟߊ߫ ߞߵߊߟߎ߫ ߕߊ߫ ߞߍߕߊ ߟߐ߲߫ ߖߐ߫.
(69) ߊߟߊ߫ ߘߏ߲߬ ߓߍߣߊ߬ ߞߕߌ߫ ߊߟߎ߫ ߕߍ߫ ߟߐ߬ߓߊ ߟߏ߲ ߊߟߎ߫ ߟߊ߫ ߢߐ߲߯ ߛߐߛߐ߫ ߞߏ ߟߎ߬ ߘߐ߫.
(70) ߌ ߡߴߊ߬ ߟߐ߲߫ ߓߊ߬ ߞߏ߫ ߊߟߊ߫ ߞߊ߬ ߛߊ߲߫ ߘߐ߫ ߞߏ ߣߌ߫ ߘߎ߰ ߘߐ߬ ߞߏ ߟߐ߲߫؟ ߸ ߓߊ ߊ߬ߟߎ߬ ߦߋ߫ ߟߍߙߊ ߟߋ߬ ߞߣߐ߫ ، ߏ߬ ߘߏ߲߬ ߣߐ߲߰ߡߊ߲߬ߓߊ ߟߋ߬ ߊߟߊ߫ ߡߊ߬.
(71) ߊ߬ߟߎ߬ ߦߋ߫ ߝߋ߲߫ ߠߋ߫ ߓߊ߬ߕߏ߬ ߟߊ߫ ߞߵߊߟߊ߫ ߕߏ߫ ߸ ߊ߬ ߡߊ߫ ߘߊ߬ߟߎ߬ ߛߌ߫ ߟߊߖߌ߰ ߡߍ߲ ߠߊ߫ ، ߊ߬ ߣߌ߫ ߝߋ߲߫ ߜߘߍ߫ ߸ ߡߍ߲ ߟߐ߲ߠߌ߲߫ ߛߌ߫ ߕߍ߫ ߊ߬ߟߎ߬ ߟߊ߫ ، ߒ߬ߓߊ߬ ߘߍ߬ߡߍ߲߬ߓߊ߰ ߛߌ߫ ߕߍ߫ ߕߐ߬ߢߍ߰ߒߕߋ ߟߎ߬ ߟߊ߫.
(72) ߣߌ߫ ߒ߬ ߠߊ߫ ߟߝߊߙߌ߫ ߘߐߞߣߍߣߍ߲ ߠߎ߬ ߘߐߞߊ߬ߙߊ߲߬ ߘߴߊ߬ߟߎ߬ ߦߋ߫ ߸ ߌ ߘߌ߫ ߟߊ߬ߜߏߦߊߢߍ ߟߐ߲߫ ߓߊ߲߬ߓߊ߮ ߟߎ߬ ߢߊߘߐߟߊ ߟߎ߬ ߘߐ߫ ߸ ߝߏ߫ ߊ߬ߟߎ߬ ߓߍߢߌߣߌ߲߫ ߞߵߊ߬ߟߎ߬ ߗߍ߫ ߒ߬ ߠߊ߫ ߟߝߊߙߌ ߟߎ߬ ߘߐߞߊ߬ߙߊ߲߬ߓߊ߮ ߟߎ߫ ߞߊ߲߬ ߊ߬ߟߎ߬ ߦߋ߫ ، ߊ߬ ߝߐ߫ ߞߏ߫ ߒ ߧߴߊߟߎ߫ ߞߌ߬ߓߊ߬ߙߏ߬ ߞߏ߫ ߟߊ߫ ߓߊ߬ ߡߍ߲ ߞߊ߫ ߖߎ߯ ߣߌ߲߬ ߓߍ߯ ߘߌ߫؟ ߸ ߏ߬ ߦߋ߫ ߕߊ߫ ߟߋ߬ ߘߌ߫ ߸ ߊߟߊ߫ ߣߊ߬ ߓߊ߲߬ߓߊ߮ ߟߎ߬ ߦߟߌߛߌ߰ ߟߊ߫ ߡߍ߲ ߠߊ߫ ، ߏ߬ ߘߏ߲߬ ߦߋ߫ ߟߊ߬ߓߊ߲߬ ߦߙߐ߬ ߖߎ߯ ߘߌ߫ ߞߟߋ߫.
(73) ߤߍ߲߬ ߊߟߎ߬ ߡߐ߱ ߟߎ߬ ߸ ߛߊ߲߬ߘߊ߫ ߟߋ߬ ߟߊߣߍ߲߫ ߊߟߎ߫ ߦߋ߫ ߣߌ߲߬ ߸ ߊߟߴߊߟߎ߫ ߕߟߏߡߊߟߐ߬ ߏ߬ ߟߊ߫: ߐ߲߬ߤߐ߲߫ ߸ ߊߟߎ߫ ߦߋ߫ ߝߋ߲ ߡߍ߲ ߠߎ߬ ߞߟߌ߫ ߟߊ߫ ߞߵߊߟߊ߫ ߕߏ߫ ߸ ߏ߬ ߟߎ߬ ߕߍߣߊ߬ ߟߌߡߐ߯ߣߍ߲߫ ߞߋߟߋ߲߫ ߘߊ߲߫ ߠߊ߫ ߸ ߤߟߴߊ߬ߟߎ߬ ߓߊ߯ ߊ߬ߟߎ߬ ߟߊߘߍ߬ ߏ߬ ߞߍ߫ ߞߊ߲ ߡߊ߬ ، ߣߌ߫ ߟߌߡߐ߯ߣߍ߲ ߝߊ߲߭ ߞߊ߬ ߝߋ߲ ߘߏ߫ ߓߏ߬ߛߌ߫ ߊ߬ߟߎ߬ ߟߊ߫ ߸ ߊ߬ߟߎ߬ ߕߍ߫ ߛߴߏ ߕߊ߬ ߟߴߊ߬ ߓߟߏ߫ ، ߓߊ߬ߕߏ߬ߟߊ ߣߌ߫ ߓߊ߬ߕߏ߬ߕߊ ߟߊ߫ ߗߙߐߞߐ ߖߍ߬ߘߍ ߟߴߏ߬ ߘߌ߫ ߞߟߋ߫.
(74) ߊ߬ߟߎ߬ ߡߴߊߟߊ߫ ߓߏ߲߬ߧߴߊ߬ ߓߏ߲߬ߧߊ߬ ߢߊ ߕߎ߬ߢߊ ߟߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߝߊ߲߬ߞߊ߬ߡߊ߫ ߘߌ߫ ߸ ߊ߰ ߣߌ߬ߣߌ߬ߟߊ߫ ߘߌ߫.
(75) ߊߟߊ߫ ߦߋ߫ ߞߋߟߊ ߘߏ߫ ߟߎ߫ ߛߎߥߊ߲ߘߌ߫ ߟߊ߫ ߡߟߍ߬ߞߊ ߟߎ߬ ߘߐ߫ ߸ ߊ߬ ߣߌ߫ ߡߐ߱ ߟߎ߬ ߘߐ߫ ، ߖߊ߯ߕߋ߬ ߸ ߊߟߊ߫ ߦߋ߫ ߡߍ߲ߠߌ߲ߠߊ߫ ߘߌ߫ ߸ ߊ߬ ߦߋ߫ ߦߋߟߌߟߊ߫ ߘߌ߫.
(76) ߊ߬ ߘߏ߲߬ ߞߵߏ߬ ߟߎ߬ ߢߍ߫ ߞߏ ߣߴߊ߬ߟߎ߬ ߞߐ߫ ߞߏ ߟߐ߲߫ ، ߞߏ߬ߣߌ߲߬ ߞߏ ߟߎ߬ ߟߊߛߊ߬ߦߌ߲߬ߕߐ߫ ߊߟߊ߫ ߟߋ߫ ߡߊ߬ ߘߋ߬.
(77) ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߐߡߊߓߌߘߌ߲ ߞߍ߫ ߸ ߊߟߎ߫ ߕߌ߲ߓߌߘߌ߲ ߞߍ߫ ߸ ߊߟߎ߫ ߦߴߊߟߎ߫ ߡߊ߰ߙߌ ߓߊ߬ߕߏ߬ ߸ ߊ߬ ߣߴߊߟߎ߫ ߤߙߊ߫ ߟߋ߬ ߞߍ߫ ߘߋ߬ ، ߖߐ߲߰ߛߴߊߟߎ߫ ߘߌ߫ ߛߎߘߊ߲߫.
(78) ߊߟߎ߫ ߦߋ߫ ߘߐ߬ߖߊ ߞߍ߫ ߊߟߊ߫ ߞߏ ߘߐ߫ ߸ ߊ߬ ߟߊ߫ ߘߐ߬ߖߊ ߕߎ߬ߢߊ ߟߋ߬ ߟߊ߫ ، ߓߊ ߊ߬ߟߋ ߟߋ߫ ߞߵߊߟߎ߫ ߛߎߥߊ߲ߘߌ߫ ، ߊ߬ ߘߏ߲߬ ߡߊ߫ ߜߍ߲߬ߘߍ߬ ߛߌ߫ ߞߍ߫ ߊߟߎ߫ ߟߊ߫ ߘߌ߯ߣߊ ߘߐ߫ ، ߊߟߎ߫ ߝߊ߬ ߌߓߎ߬ߙߊ߬ߤߌߡߊ߫ ߟߊ߫ ߣߊߡߎ߲ ߢߊ ߡߊ߬ ߖߐ߫ ߸ ߊ߬ߟߋ ߟߋ߫ ߞߵߊߟߎ߫ ߕߐ߯ߟߊ߫ ߓߌ߬ ߢߍ߫ ߞߏ߫ ߛߌ߬ߟߊ߬ߡߊ ߟߎ߬ ( ߖߘߍ߬ߞߟߏ߬ߦߊ߬ߓߊ߮ ߟߎ߫ ߞߊ߬ߣߌ߲߫ ) ، ߊ߬ ߣߌ߫ ( ߞߎ߬ߙߊ߬ߣߊ ) ߢߌ߲߬ ߝߣߊ߫ ߘߐ߫ ߸ ߖߐ߲߬ߛߊ߫ ߞߋߟߊ ߘߌ߫ ߞߍ߫ ߛߙߋ ߘߴߊߟߎ߫ ߡߊ߬ ، ߊߟߎ߫ ߦߋ߫ ߞߍ߫ ߛߙߋ ߘߌ߫ ߡߐ߱ ߕߐ߭ ߟߎ߫ ߡߊ߬. ߒ߬ߓߵߊߟߎ߫ ߦߋ߫ ߛߊߟߌ ߟߐ߬ ߸ ߊߟߎ߯ ߖߞߊ ߘߌ߫ ߸ ߊ߬ ߣߴߊߟߎ߫ ߦߴߊߟߎ߫ ߓߟߏߞߍ߫ ߊߟߊ߫ ߟߊ߫ ، ߏ߬ ߟߋ ߊߟߎ߫ ߟߊ߫ ߞߏߕߌ߮ ߘߌ߫ ߸ ߞߏߕߌ߯ ߢߌߡߊ߫ ߟߴߏ߬ ߘߌ߫ ߸ ߘߍ߬ߡߍ߲߬ߓߊ߰ ߢߌߡߊ߫ ߟߋ߬ ߝߣߊ߫ ߦߋ߫.