(1) ߊ߰ ߒ ߣߌ߫ ( ߝߢߐ߫ ) ߖߎߙߎ߲ߖߎߙߎ߲ߠߌ߲ߠߊ ߟߎ߬ ߕߍ߫ ߛߎߋߛߎߋ߫.
(2) ߊ߰ ߒ ߣߌ߫ ߕߊ߬ߟߌ߬ߟߊ ߟߎ߬ ߕߍ߫ ߢߐ߯ߞߐߞߐ߫.
(3) ߊ߰ ߒ ߣߌ߫ ߞߎߟߎ߲ߞߎߟߎ߲ߠߊ ߟߎ߬ ߕߍ߫ ߓߟߐߟߐߟߐ߫
(4) ߊ߰ ߒ ߣߌ߫ ߝߋ߲߫ ߘߐߕߟߊߟߊ ߟߎ߬ ߕߍ߫ ߛߎߋ߫.
(5) ߊߟߎ߫ ߦߟߌߡߊߘߌߦߊߣߍ߲߫ ߞߏ ߡߍ߲ ߠߊ߫ ، ߖߊ߯ߕߋ߬ ߸ ߕߎ߬ߢߊ߫ ߟߋ߬.
(6) ߛߙߊ߬ߟߌ ߘߏ߲߬ ، ߖߊ߯ߕߋ߬ ߸ ߏ߬ ߞߍߕߐ߫ ߟߋ߬.
(7) ߊ߰ ߒ ߣߌ߫ ߛߊ߲ ߕߍ߫ ߸ ߏ߬ ߡߍ߲ ߦߋ߫ ߛߌߟߊ߫ ߛߘߍߡߊ߲ ߕߌ߱ ߘߌ߫.
(8) ߖߊ߯ߕߋ߬ ߸ ߊߟߎ߫ ߦߋ߫ ߞߎߡߊ߫ ߝߐߣߍ߲߫ ߢߐ߲߰ ߞߐ ߟߋ߬ ߞߊ߲߬.
(9) ߡߐ߰ ߟߋ߬ ߞߕߐߡߊߛߊ߬ߦߌ߬ ߟߊ߫ ߞߊ߬ ߓߐ߫ ߏ ߡߊ߬ ߸ ߡߍ߲ ߞߕߐߡߊߛߊ߬ߦߌ߬ ߘߊ߫.
(10) ߞߎ߲߬ߘߐ߬ߕߍ߰ߟߊ ߟߎ߬ ߘߊ߲ߞߊߣߍ߲߫ ߠߋ߬.
(11) ߏ߬ ߟߎ߬ ߡߍ߲ ߠߎ߫ ߢߌ߬ߣߊ߬ߣߍ߲ ߦߋ߫ ߓߌ߬ߘߏ߲߬ߓߌߘߏ߲ ߘߐ߫.
(12) ߊ߬ߟߎ߬ ߦߋ߫ ߢߌ߬ߣߌ߲߬ߞߊ߬ߟߌ ߟߊ߫ ߸ ߞߏ߫ ߛߙߊ߬ߟߌ ߟߏ߲ ߦߋ߫ ߕߎ߬ߡߊ ߖߐ߲߫ ߘߌ߫؟.
(13) ߏ߬ ߟߋ ߘߏ߲߬ ߊ߬ߟߎ߬ ߞߘߐߓߐߟߏ߲ ߘߌ߫ ߕߊ ߟߊ߫.
(14) ߞߏ߫ ߊߟߎ߫ ߦߴߊߟߎ߫ ߟߊ߫ ߞߘߐߓߐߟߌ ߡߊߜߙߏ߬ ߥߍ߫ ، ߓߊ ߝߋ߲߫ ߠߋ߫ ߣߌ߲߬ ߊߟߎ߫ ߕߘߍ߬ ߞߌߢߍ߫ ߟߊ߫ ߡߍ߲ ߠߊ߫.
(15) ߖߊ߯ߕߋ߬ ߸ ߝߊ߲ߕߊ߲ߞߟߊ ߟߎ߬ ߦߋ߫ ߣߊߞߐ ߟߎ߬ ߣߌ߫ ߞߐ߬ߢߊ ߟߎ߫ ߟߋ߬ ߘߐ߫.
(16) ߊ߬ߟߎ߬ ߦߋ߫ ߝߋ߲߫ ߠߎ߫ ߟߊߞߢߐ߬ߡߊ߬ ߟߊ߫ ߸ ߊ߬ߟߎ߫ ߡߊ߰ߙߌ ߦߋ߫ ߡߍ߲ ߠߎ߬ ߘߌ߫ ߟߴߊ߬ߟߎ߫ ߡߊ߬ ، ߓߊ ߏ߬ ߢߍ߫ ߞߘߐ߬ߡߊ߲߫ ߸ ߊ߬ߟߎ߫ ߕߍ߬ߘߍ߫ ߢߊ߬ߓߊ߮ ߟߎ߫ ߟߋ߬ ߘߌ߫.
(17) ߊ߬ ߘߏ߲߬ ߞߊ߫ ߘߐ߯ ߊ߬ߟߎ߫ ߕߘߍ߬ ߡߍ߲ ߛߎ߬ߣߐ߰ ߟߊ߫ ߛߎ ߘߐ߫.
(18) ߊ߬ ߣߴߊ߬ߟߎ߫ ( ߕߘߍ߬ ) ߦߝߊ߬ ߢߌߣߌ߲ ߞߍ߫ ߟߊ߫ ߛߎ߫ ߟߊߓߊ߲ ߠߎ߬ ߟߊ߫ ߞߍ߬ߣߍ߲.
(19) ߣߌ߭ ߦߴߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߘߐ߫ ߕߙߊߟߌߟߊ ߣߌ߫ ߞߏߘߐߖߊߓߊ߯ߕߐ ߦߋ߫.
(20) ߕߐ߰ߡߊ߬ߛߙߋ߬ ߛߌߦߊߡߊ߲߫ ߠߋ߬ ߘߎ߱ ߞߊ߲߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫.
(21) ߊ߬ ߣߴߊߟߎ߫ ߖߍ߬ߘߍ ߝߣߊ߫ ߘߐ߫ ، ߦߊ߯ߟߴߊߟߎ߫ ߕߍ߫ ߦߋߟߌ߫ ߟߋ߬ ߞߍ߫ ߟߊ߫ ߓߊ߬؟.
(22) ߊߟߎ߫ ߓߊߟߏ ߦߋ߫ ߛߊ߲ ߠߋ߬ ߘߐ߫ ߸ ߊ߬ ߣߌ߫ ߞߐ߲߬ߞߐ߲߬ ߞߍߣߴߊߟߎ߫ ߡߊ߬ ߡߍ߲ ߘߐ߫.
(23) ߊ߰ ߒ ߣߌ߫ ߛߊ߲ ߣߌ߫ ߘߎ߱ ߡߊ߰ߙߌ ߕߍ߫ ߸ ߊ߬ ߦߋ߫ ߕߎ߬ߢߊ߫ ߟߋ߬ ߘߌ߫ ߖߊ߯ߕߋ߬ ߸ ߦߏ߫ ߊߟߎ߫ ߦߋ߫ ߞߎߡߊ߫ ߟߊ߫ ߢߊ ߡߍ߲.
(24) ߦߊ߯ߟߊ߫ ߌߓߎ߬ߙߊ߬ߤߌ߯ߡߊ߫ ߟߊ߫ ߟߏ߲ߟߊ߲ߓߊ ߟߎ߫ ߓߊ߬ߘߏ ߣߊ߬ ߘߴߌ ߡߊ߬ ߓߊ߬.
(25) ߕߎ߬ߡߊ ߡߍ߲ ߊ߬ߟߎ߫ ߘߏ߲߬ ߘߴߊ߬ ߞߊ߲߬ ߝߏ߬ߟߌ ߘߌ߫ ، ߞߏ߫ ߖߐ ߦߴߌ ߡߊ߬ ، ߊ߬ ߝߣߊ߫ ߞߊ߲߫ ߞߏ߫ ߖߐ ߦߴߊߟߎ߫ ߡߵߊߟߎ߬ ߡߌ߬ߙߌ߲߬ߘߌ߬ ߡߊߝߟߌ߬ߣߍ߲ ߠߎ߬.
(26) ߘߊ߬ߡߊ߲߬ߛߊ߫ ߸ ߊ߬ ߝߊ߲ߞߊ߲߫ ߘߊ߫ ߞߊ߬ ߥߊ߫ ߘߏ߲߬ ߊ߬ ߟߊ߫ ߘߋ߲ߓߦߊ ߞߊ߲߬ ، ߏ߬ ߞߍ ߸ ߊ߬ ߞߐߛߊߦߌ߲ ߣߊ߬ ߘߊ߫ ߕߎߙߊߣߍ߲߫ ߕߟߐ߬ߣߍ߲߫ ( ߛߏ߬ߓߏ ) ߘߌ߫.
(27) ߊ߬ ߞߵߏ߬ ߡߊߘߏ߲߬ ߊ߬ߟߎ߬ ߟߊ߫ ߞߵߊ߬ ߝߐ߫ ߞߏ߫ ߊߟߎ߫ ߕߍ߫ ߘߊߥߎ߲ߠߌ߲ ߞߍ߫؟.
(28) ߏ߬ ߞߍ ߸ ߊ߬ ߡߛߌ߬ߡߛߌ߬ ߘߴߊ߬ߟߎ߬ ߢߍ߫ ߛߌߟߊ߲ ߘߌ߫ ، ߊ߬ߟߎ߬ ߞߊ߲߫ ߞߴߌ ߞߊ߫ ߛߌߟߊ߲߫ ߘߋ߬ ، ߊ߬ ߣߴߊ߬ߟߎ߫ ߞߵߊ߬ߟߎ߬ ߘߟߊߝߎ߬ ߊ߬ ߦߋ߫ ߘߋ߲ߞߍ߫ ߟߐ߲ߠߌ߲ߠߊ߫ ߟߊ߫.
(29) ߏ߬ ߞߍ ߸ ߊ߬ ߡߏ߬ߛߏ ߣߊ߬ ߘߊ߫ ߞߎߟߋ ߘߌ߫ ، ߞߵߊ߬ ߢߘߊ ߡߊߜߊ߬ߛߌ߬ ߸ ߞߵߊ߬ ߝߐ߫ ߞߏ߫ ߞߏ߬ߣߊ߬ ߡߛߏ߬ߞߘߐ߬ߣߍ߲ ߖߍ߬ߘߍ ( ߏ߬ ߦߋ߫ ߘߋ߲߫ ߛߐ߬ߘߐ߲߫)؟.
(30) ߊ߬ߟߎ߬ ߞߊ߲߫ ߞߏ߫ ߌ ߡߊ߰ߙߌ ߞߊ߲߫ ߕߋ߲߬ ߠߋ߬ ߘߋ߬ ، ߏ߬ ߟߋ ߘߏ߲߬ ߦߋ߫ ߥߘߋ߬ߥߘߋ߬ߟߌ߬ߟߊ߫ ߟߐ߲ߠߌ߲ߠߊ ߘߌ߫.
(31) ‹ ߌߓߎ߬ߙߊ߬ߤߌߡߊ߫ › ߣߊ߬ ߘߴߊ߬ ߝߐ߫ ߞߏ߫ ߊߟߎ߫ ߘߏߘߌ߫ ߥߍ߫ ߊߟߎ߬ ߗߋߘߋ߲ ߠߎ߬.
(32) ߊ߬ߟߎ߬ ߞߊ߲߫ ߞߏ߫ ߒ߬ ߗߋߣߍ߲߫ ߡߌ߬ߙߌ߲߬ߘߌ߫ ߛߐ߲߬ߡߊ ߟߎ߫ ߟߋ߫ ߡߊ߬.
(33) ߞߏ߫ ߊ߲ ߧߋ߫ ߓߍ߬ߙߍ ߓߐ߰ߟߊ߬ߡߊ ߗߋ߫ ߊ߬ߟߎ߬ ߞߊ߲ߡߊ߬.
(34) ߏ߬ ߟߎ߫ ߕߐ߰ߡߊ߬ߛߙߋ߬ߦߊ߬ߣߍ߲߫ ߠߋ߬ ߌ ߡߊ߰ߙߌ ߓߘߊ ߖߊߛߟߌߟߊ ߟߎ߬ ߦߋ߫.
(35) ߊ߲ ߞߊ߬ ߘߍ߲߬ߞߣߍ߬ߦߊ߬ߓߊ߮ ߡߍ߲ ߠߎ߫ ߕߍ߬ߘߍ߫ ߦߋ߲߬ ߸ ߊ߲ ߞߵߏ߬ ߟߎ߬ ߟߊߓߐ߫.
(36) ߊ߲ ߝߊ߲߭ ߡߊ߫ ߛߌ߬ߟߡߊ߬ ߛߌ߫ ߛߐ߬ߘߐ߲߫ ߦߋ߲߬ ߝߏ߫ ߟߎ߫ ߞߋߟߋ߲߫ ߔߋ߫.
(37) ߊ߲ ߘߏ߲߬ ߞߊ߬ ߕߐ߰ߡߊ߬ߛߙߋ ߘߏ߫ ߕߏ߫ ߦߋ߲߬ ߸ ߖߊ߲߰ߞߕߊ߬ ߘߌߡߌ߲ߣߍ߲ ߢߍߛߌߟߊ߲ߢߍߓߊ߮ ߟߎ߬ ߦߋ߫.
(38) ߊ߬ ߣߌ߫ ߡߎߛߊ߫ ߞߏ ߝߣߊ߫ ߸ ߕߎ߬ߡߊߡߍ߲ ߊ߲ ߞߵߏ߬ ߗߋ߫ ߝߋߙߊߥߎ߲߫ ߡߊ߬ ߘߊ߬ߟߎ߬ ߘߐ߬ߜߍ ߟߎ߬ ߘߌ߫.
(39) ߏ߬ ߞߵߊ߬ ߞߐߘߏ߲߬ ߊ߬ ߟߊ߫ ߝߊ߲߭ ߘߌ߫ ߸ ߞߵߊ߬ ߝߐ߫ ߏ ߡߊ߬ ߞߏ߫ ߛߎߓߊ߮ ߥߟߊ߫ ߝߊ߬ߕߐ.
(40) ߏ߬ ߞߍ ߸ ߊ߲ ߞߵߊ߬ ߣߴߊ߬ ߟߊ߫ ߞߟߍ߬ߓߏߟߏ߲ ߠߎ߬ ߕߍ߯ߕߊ߬ ߸ ߞߵߊ߬ߟߎ߬ ߟߊߝߟߌ߬ ߓߊ߫ ߞߎߣߊ߲ ߘߐ߫ ߸ ߞߵߊ߬ ߕߘߍ߬ ߊ߬ ߦߋ߫ ߖߙߊ߬ߞߌ߬ߕߊ߫ ߘߌ߫.
(41) ߊ߬ ߣߌ߫ ߊ߯ߘߌ ߟߎ߬ ߝߣߊ߫ ߘߐ߫ ߸ ߕߎ߬ߡߊ ߡߍ߲ ߊ߲ ߞߊ߬ ߝߢߐ߫ ߞߏ߬ߣߟߊ߬ߡߊ ߗߋ߫ ߏ߬ ߟߎ߬ ߞߊ߲ߡߊ߬.
(42) ߏ߬ ߕߍ߫ ߣߊ߬ ߝߏߦߌ߬ ߞߊ߲ߡߊ߬ ߞߏ߫ ߊ߬ ߘߴߏ߬ ߕߏ߫ ، ߝߏ߫ ߊ߬ ߦߴߏ߬ ߞߍ߫ ߟߋ߬ ߖߐ߫ ߦߏ߫ ( ߝߋ߲߫ ) ߡߎ߰ߡߎ߰ߣߍ߲.
(43) ߊ߬ ߣߌ߫ ߛߊ߬ߡߎ߯ߘߊ ߟߎ߬ ߝߣߊ߫ ߘߐ߫ ߸ ߕߎ߬ߡߊ ߡߍ߲ ߊ߬ ߝߐ߫ ߘߴߏ߬ ߟߎ߬ ߦߋ߫ ߞߏ߫ ߊߟߎ߫ ߦߴߊߟߎ߫ ߘߊ߰ߡߎ߲߬ ߛߊߣߌ߬ ߥߊ߯ߕߌ߫ ߕߍ߫.
(44) ߏ߬ ߟߎ߫ ߞߵߊ߬ߟߎ߬ ߜߛߋߞߘߎ߬ ߞߊ߬ ߓߐ߫ ߊ߬ߟߎ߫ ߡߊ߰ߙߌ ߟߊ߫ ߖߊ߬ߡߊߙߌ ߞߣߐ߫ ، ߏ߬ ߞߍ ߜߊ߬ߙߊ߲߬ߞߕߊ ߞߵߊ߬ߟߎ߫ ߡߌ߬ߘߊ߬ ߛߌ߲߯ߜߙߐ߬ ߸ ߞߵߊ߬ ߕߘߍ߬ ߊ߬ߟߎ߬ ߦߋ߫ ߝߟߍߟߌ ߟߊ߫.
(45) ߊ߬ߟߎ߬ ߡߊ߫ ߛߴߊ߬ߟߎ߫ ߥߟߌ߬ ߟߊ߫ ߞߵߊ߬ߟߎ߫ ߟߐ߬ ، ߊ߬ߟߎ߫ ߘߏ߲߬ ߡߊ߫ ߞߍ߫ ߊ߬ߟߎ߬ ߕߊߛߙߊ߬ߓߊ߯ ߟߎ߫ ߘߌ߫.
(46) ߊ߬ ߣߌ߫ ߣߎߤߎ߲߫ ߡߌ߬ߙߌ߲߬ߘߌ ߘߐ߫ ߸ ߏ߬ ߟߎ߫ ߕߘߍ߬ ߢߌ߲߬ ߠߎ߬ ߢߍ߫ ߞߘߐ߬ߡߊ߲߫ ، ߏ߬ ߟߎ߫ ߘߏ߲߬ ߞߍߣߍ߲߫ ߡߌ߬ߙߌ߲߬ߘߌ߬ ߔߊߟߊ߲ߞߊߣߍ߲߫ ߠߋ߬ ߘߌ߫ ߘߋ߬.
(47) ߛߊ߲߫ ߞߟߐ ߘߏ߲߬ ߸ ߊ߲ ߞߵߏ߬ ߟߐ߬ ߝߊ߲߬ߞߊ ߟߋ߬ ߟߊ߫ ، ߖߊ߯ߕߋ߬ ߸ ߒ߬ߠߎ߬ ߦߋ߫ ߟߊ߬ߦߙߌ߬ߥߊ߬ߟߌ߬ߟߊ ߟߎ߫ ߟߋ߬ ߘߌ߫.
(48) ߘߎ߰ߞߝߏ ߝߣߊ߫ ߸ ߊ߲ ߞߵߏ߬ ߘߐߝߎߟߋ߲߫ ، ߘߐ߬ߝߍ߲߬ߛߍ߲߬ߠߌ߲߬ߠߊ߬ ߢߌߡߊ ߟߎ߫ ߟߋ߬ ߒ߬ߠߎ߬ ߘߌ߫ ߘߋ߬.
(49) ߊ߲ ߞߊ߬ ߝߌ߬ߟߊ߬ߓߊ ߘߊ߲߫ ߝߋ߲ ߓߍ߯ ߟߋ߬ ߘߐ߫ ߸ ߛߴߊߟߎ߫ ߘߴߊߟߎ߫ ߕߊ߰ߛߌ߫.
(50) ߒ߬ߓߊ߬ ߊߟߎ߫ ߦߴߊߟߎ߫ ߓߏ߬ߙߌ߬ ߞߊߕߙߍ߬ ߊߟߊ߫ ߟߋ߫ ߡߊ߬ ߸ ߒߠߋ ߞߏ߬ߣߌ߲ ߖߊ߬ߛߙߋ߬ߡߊ߬ߟߌ߬ߟߊ߬ ߘߐ߬ߜߍ߫ ߟߋ߬ ߘߴߊߟߎ߫ ߦߋ߫ ߞߊ߬ ߝߘߴߊ߬ߟߋ߬ ( ߊߟߊ߫ ) ߟߊ߫.
(51) ߊߟߎ߫ ߞߣߊ߫ ߡߊ߰ߙߌ߬ ߜߘߍ߫ ߞߍ߫ ߊߟߊ߫ ߝߍ߬ ߘߋ߬ ߸ ߒߠߋ ߞߏ߬ߣߌ߲ ߖߊ߬ߛߙߋ߬ߡߊ߬ߟߌ߬ߟߊ߬ ߘߐ߬ߜߍ߫ ߟߋ߬ ߘߴߊߟߎ߫ ߦߋ߫ ߸ ߞߊ߬ ߝߘߴߊ߬ߟߋ߬ ( ߊߟߊ߫ ) ߟߊ߫.
(52) ߊ߬ ߘߏ߲߬ ߕߋ߲߬ ߠߋ߬ ، ߞߋߟߊ߫ ߛߌ߫ ߡߊ߫ ߣߵߊ߬ߟߎ߬ ߢߍߓߊ߮ ߟߎ߫ ߡߊ߬ ߸ ߣߴߏ߬ ߟߎ߬ ߡߴߊ߬ ߝߐ߫ ߏ ߡߊ߬ ߸ ߞߏ߫ ߛߎߓߊ߮ ߟߴߏ߬ ߘߌ߫ ߥߟߊ߫ ߝߊ߬ߕߐ.
(53) ߦߊ߯ߟߴߊ߬ߟߎ߫ ߣߊ߬ ߢߐ߲߮ ߡߊߛߙߊ߬ ߟߴߏ߬ ߟߋ ߟߊ߫ ߓߊ߬؟ ، ߍ߲߬ߍ߲߫ ߸ ߊ߬ߟߎ߬ ߦߋ߫ ߡߌ߬ߙߌ߲߬ߘߌ߫ ߘߊ߲߬ߠߊߕߊ߬ߡߌ߲߬ߣߍ߲ ߠߎ߫ ߟߋ߬ ߘߌ߫ ߕߎ߲߫.
(54) ߒ߬ߓߊ߬ ߌߟߋ ߌ ߞߐߘߏ߲߬ ߊ߬ߟߎ߬ ߟߊ߫ ߘߏߦߌ߲߫ ، ߌߟߋ ߞߏ߬ߣߌ߲ ߕߍ߫ ߖߙߊ߬ߞߌ߬ߕߊ߫ ߘߌ߫.
(55) ߊ߬ ߣߴߌ ߦߋ߫ ߟߊ߬ߟߌ߬ߟߌ ߞߍ߫ ߸ ߓߊ ߟߊ߬ߟߌ߬ߟߌ ߟߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߣߝߊ߫ ߟߊ߫.
(56) ߒߠߋ ߡߊ߫ ߥߐ߬ߞߎߟߐ ߣߌ߫ ߡߐ߱ ߘߊ߲߫ ߞߎ߲߬ ߛߌ߫ ߟߊ߫ ߸ ߝߏ߫ ߊ߬ߟߎ߬ ߦߋ߫ ߒ ߓߊ߬ߕߏ߫ ߟߋ߬.
(57) ߒ ߡߊ߫ ߤߊ߬ߙߌ߬ߖߍ߰ ߢߌߣߴߊ߬ߟߎ߬ ߟߊ߫ ߸ ߒ ߘߏ߲߬ ߡߴߊ߬ ߢߌߣߌ߲߫ ߒ ߞߏ߫ ߊ߬ߟߎ߬ ߦߋ߫ ߒ ߘߡߊߢߌߣߌ߲߫.
(58) ߖߊ߯ߕߋ߬ ߸ ߊߟߊ߫ ߟߋ߫ ߤߊ߬ߙߌ߬ߖߍ߰ߟߊ߫ ߝߊ߲߬ߞߊ߬ߡߊ߫ ߝߊ߬ߛߊ߲߬ߡߊ߲ ߘߌ߫.
(59) ߒ߬ߓߊ߬ ߖߟߎ߬ߝߍ߬ ߢߊ߬ ߞߋߟߋ߲߫ ߣߌ߭ ߟߋ߬ ߕߐ߬ߢߍ߰ߒߕߋ ߟߎ߬ ߦߋ߫ ߸ ߦߏ߫ ߊ߬ߟߎ߫ ߕߐ߬ߢߐ߮ ߟߎ߬ ߟߊ߫ ߖߟߎ߬ߝߍ߬ ߢߊ߬ ߞߋߟߋ߲ ߣߌ߭ ߢߐ߲߰ߘߐ ، ߏ߬ ߘߐ߫ ߸ ߤߟߴߊ߬ߟߎ߬ ߡߊ߫ ߞߌߢߍ߫ ߒ ߠߊ߫.
(60) ߒ߬ߓߊ߬ ߜߊ߬ߟߏ ߟߋ߫ ߓߊ߲߬ߓߊ߮ ߟߎ߬ ߢߍ߫ ߊ߬ߟߎ߬ ߟߊ߫ ߟߏ߲ ߘߐ߫ ، ߞߐ߲߬ߞߐ߲߬ ߞߍߣߴߊ߬ߟߎ߫ ߡߊ߬ ߡߍ߲ ߘߐ߫ ߞߊ߬ߣߌ߲߫.