(1) ߤߍ߲߬ ߌߟߋ߬ ߟߊ߬ߝߐ߬ߓߊ߮ ، ߡߎ߲߬ߠߊ߫ ߌ ߦߋ߫ ߝߋ߲߫ ߠߊߕߐ߲߫ ߠߊ߫ ߊߟߊ߫ ߣߊ߬ ߡߍ߲ ߠߊߘߤߊ߬ ߟߴߌ ߦߋ߫؟ ߏ߬ ߘߐ߫ ߌ ߦߴߌ ߝߘߎߡߊ ߟߎ߫ ߛߊ߬ߥߏ ߟߋ߬ ߢߌߣߌ߲߫ ߠߊ߫؟ ، ߊߟߊ߫ ߘߏ߲߬ ߦߝߊ߬ߟߊ߫ ߘߌ߫ ߊ߰ ߤߌߣߟߊ߫ ߘߌ߫.
(2) ߊߟߊ߫ ߓߘߴߊߟߎ߫ ߞߊ߬ߟߌ߬ ߞߊ߲ ߠߎ߬ ߘߓߐ ߛߌߟߊ ߟߊߞߵߊߟߎ߫ ߦߋ߫ ، ߊߟߊ߫ ߟߋ߫ ߘߏ߲߬ ߊߟߎ߫ ߟߊ߫ ߞߏߕߌ߮ ߘߌ߫ ، ߊ߬ ߣߴߊ߬ߟߋ ߟߋ߬ ߟߐ߲ߠߌ߲ߠߊ߫ ߥߘߋ߬ߥߘߋ߬ߟߌ߬ߟߊ ߘߌ߫.
(3) ߕߎ߬ߡߊ ߡߍ߲ ߟߊ߬ߝߐ߬ߓߊ߮ ߞߊ߬ ߞߎߡߊ ߘߏ߫ ߜߎ߲߬ߘߎ߫ ߊ߬ ߝߘߎߡߊ ߟߎ߬ ߘߏ߫ ߦߋ߫ ، ߏ ߣߵߏ߬ ߝߊߙߊ߲ߛߊ߫ ߟߊ ߸ ߊߟߊ߫ ߞߵߏ߬ ߟߊ߲ߞߣߍߡߦߊ߫ ߞߋߟߊ ߦߋ߫ ، ߊ߬ ߞߊ߬ ߖߐ߲߫ ߠߊߓߐ ߞߍ߫ ߊ߬ ߘߏ߫ ߟߋ߬ ߟߊ߫ ߸ ߞߵߊ߬ ߞߐߘߏ߲߬ ߘߏ߫ ߟߊ߫ ، ߊ߬ ߣߵߏ߬ ߖߐ߲ ߠߊߓߐ߫ ߟߊ ߡߏ߬ߛߏ ߏ ߡߊ߬ ߸ ߏ߬ ߞߊ߲߫ ߞߏ߫ ߖߍߣߍ߲ ߞߵߏ߬ ߝߐ߫ ߌ ߦߋ߫؟ ، ߊ߬ ߞߵߊ߬ ߖߋ߬ߓߌ߬ ߞߏ߫ ߟߐ߲ߠߌ߲ߠߊ߫ ߞߟߊ߬ߡߊ߬ߓߊ߮ ߟߋ߫ ߞߵߊ߬ ߝߐ߫ ߒ ߧߋ߫.
(4) ߣߴߊߟߎ߫ ߝߌ߬ߟߊ ߞߏ߬ߣߌ߲ ߘߴߊߟߎ߫ ߖߘߍ߬ߟߊߛߊ߬ߦߌ߲߬ ߊߟߊ߫ ߡߊ߬ ߸ ( ߣߴߏ߬ ߕߍ߫ ) ߊߟߎ߫ ߝߌ߬ߟߊ ߛߣߐ߬ߡߍ ߓߘߊ߫ ߖߍ߲߬ߞߍ߫ ߘߋ߬. ߣߴߊߟߎ߫ ߝߌ߬ߟߊ ߘߏ߲߬ ߞߵߊߟߎ߫ ߢߐ߲߮ ߞߐߞߘߐߘߍ߬ߡߍ߲߬ ( ߞߋߟߊ ) ߡߊ߬ ߸ ߏ߬ ߘߐ߫ ߊߟߊ߫ ߟߴߊ߬ ߢߌ߲߭ ߘߌ߫ ، ߊ߬ ߣߌ߫ ߖߌ߬ߓߙߌ߬ߟߎ߫ ߣߌ߫ ߘߍ߲߬ߞߣߍ߬ߦߊ߬ߓߊ߰ ߢߌߡߊ ߟߎ߬ ، ߏ߬ ߞߐ߫ ߡߟߍ߬ߞߊ ߓߍ߯ ߊ߬ ߘߍ߬ߡߍ߲߬ߓߊ߯.
(5) ߣߴߊ߬ ߞߵߊߟߎ߫ ߓߌ߬ߟߊ߬ ߸ ߊ߬ ߢߐ߲߰ߘߐ߫ ߊ߬ ߡߊ߰ߙߌ ߘߌ߫ ߊߟߎ߫ ߝߊ߬ߟߋ߲߬ ߊ߬ ߦߋ߫ ߝߘߎߡߊ߫ ߜߘߍ߫ ߟߎ߫ ߟߊ߫ ߸ ߡߍ߲ ߝߌ߬ߛߵߊߟߎ߫ ߘߌ߫ ، ߏ߬ ߟߎ߬ ߦߋ߫ ߛߌ߬ߟߡߊ߬ ߡߛߏ߫ ߟߎ߫ ߣߌ߫ ߘߍ߲߬ߞߣߍ߬ߦߊ߬ ߡߛߏ߫ ߟߎ߫ ߣߌ߫ ߖߘߍ߬ߞߟߏ߬ ߡߛߏ߫ ߟߎ߫ ߣߌ߫ ߖߘߍ߬ߟߛߊ߬ߦߌ߬ ߡߛߏ߫ ߟߎ߫ ߣߌ߫ ߓߊ߬ߕߏ߬ ߞߍ߬ ߡߛߏ߫ ߟߎ߫ ߣߌ߫ ߝߎ߲ߘߌ߫ ߡߛߏ߫ ߟߎ߫ ߣߌ߫ ߛߌ߲߫ ߓߋ߬ߣߍ߲߬ ߠߎ߫ ߣߌ߫ ߛߌ߲߫ ߟߐ߬ߣߍ߲߬ ߠߎ߫ ߘߌ߫.
(6) ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߴߊߟߎ߫ ߖߍ߬ߘߍ ߟߎ߬ ߣߴߊߟߎ߫ ߞߐߙߍ ߟߎ߬ ߝߊ߲ߕߊ߲߬ߞߊ߬ ߕߊ ߡߊ߬ ߸ ߡߍ߲ ߢߐ߲߬ߛߐ߲ ߦߋ߫ ߡߐ߱ ߟߎ߬ ߣߌ߫ ߞߓߊ ߟߎ߬ ߘߌ߫ ، ߡߟߍ߬ߞߊ߬ ߜߛߏߜߛߏ ( ߞߘߊ߬ ) ߜߍ߬ߟߍ߲߬ߡߊ߲߬ߓߊ ߟߎ߫ ߟߴߊ߬ ߞߎ߲߬ߠߊ߫ ، ߏ߬ ߟߎ߬ ߕߍ߫ ߊߟߊ߫ ߟߊ߫ ߖߊ߬ߡߊߙߌ ߛߐ߬ߛߐ߬ ߟߊ߫ ߸ ߊ߬ߟߎ߫ ߘߏ߲߬ ߦߴߊ߬ߟߎ߫ ߖߡߊ߬ߙߌ߬ߒ߬ߞߊ߲߬ߠߊ ߟߎ߬ ߞߍ߫ ߟߊ߫.
(7) ߤߍ߲߬ ߊߟߎ߫ ߓߊ߲߬ߓߊ߮ ߟߎ߬ ߸ ߊߟߎ߫ ߞߊ߫ ߕߙߐ߫ ߊߟߎ߫ ߘߊߘߐߡߌߘߊߞߎ߲ߧߊ߫ ߝߐ߫ ߟߊ߫ ߓߌ߬ ، ߓߊ ߊߟߎ߫ ߛߙߊ߬ߕߐ߫ ߊߟߎ߫ ߗߋߥߊߟߌ ߟߋ߬ ߘߐߙߐ߲߫ ߠߊ߫.
(8) ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߴߊߟߎ߫ ߖߘߍ߬ߟߊߛߊ߬ߦߌ߬ ߊߟߊ߫ ߡߊ߬ ߸ ߞߣߐߜߍߦߊ ߖߘߍ߬ߟߊ߬ߛߊߦߌ ߟߊ߫ ، ߊ߬ ߢߐ߲߰ߘߐ߫ ߏ߬ ߘߐ߫ ߸ ߊߟߎ߫ ߡߊ߰ߙߌ ߘߴߊߟߎ߫ ߟߊ߫ ߖߎ߯ߡߊ߲ ߠߎ߫ ߕߍ߬ ߣߐ߯ߘߌ߫ ߞߊ߬ ߓߐ߫ ߊߟߎ߫ ߡߊ߬ ، ߊ߬ ߣߌ߫ ߞߵߊߟߎ߫ ߟߊߘߏ߲߬ ߣߊߞߐ ߟߎ߬ ߘߐ߫ ߸ ߞߐ߬ߢߊ ߟߎ߯ ߥߦߏ߬ ߟߴߏ߬ ߟߎ߬ ߞߘߐߟߊ ߟߎ߬ ߘߐ߫ ، ߏ߬ ߟߏ߲ ߠߋ߬ ߸ ߊߟߊ߫ ߕߍ߫ ߟߊ߬ߝߐ߬ߓߊ߮ ߣߴߊ߬ ߝߍ߬ ߡߐ߯ ߘߍ߲߬ߞߣߍ߬ߦߊ߬ߣߍ߲ ߠߎ߬ ߟߊߡߊ߬ߟߏ߬ߦߊ߬ ߟߊ߫ ، ߏ߬ ߟߎ߬ ߦߋߟߋ߲ ߦߋ߫ ߕߊ߯ߡߊ߫ ߟߴߊ߬ߟߎ߬ ߢߍߕߐ ߣߴߊ߬ߟߎ߬ ߞߌߣߌ߲ߓߟߏ ߟߎ߫ ߝߍ߬ ، ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߡߊ߰ߙߌ ߸ ߊ߲ ߦߋߟߋ߲ ߘߝߊ߫ ߒ߬ ߧߋ߫ ߸ ߊ߬ ߣߴߌ ߦߋ߫ ߦߊ߬ߝߊ ߞߍ߫ ߒ߬ ߧߋ߫ ، ߖߊ߯ߕߋ߬ ߸ ߌߟߋ ߟߋ߬ ߛߋ߫ ߟߊ߫ ߞߏ ߓߍ߯ ߟߊ߫.
(9) ߤߍ߲߬ ߌߟߋ߫ ߟߊ߬ߝߐ߬ߓߊ߮ ߸ ߓߊ߲߬ߓߊ߮ ߟߎ߬ ߣߌ߫ ߝߌ߬ߟߊ߲߬ߞߊߝߏ ߟߎ߫ ߞߟߍ߬ ߸ ߌ ߦߋ߫ ߞߘߊ߬ߜߟߍ߬ߦߊ ߞߍ߫ ߊ߬ߟߎ߬ ߟߊ߫ ، ߊ߬ߟߎ߬ ߘߊ߯ ߦߌߟߊ ߟߋ߬ ߞߍߕߐ߫ ߔߊߦߌߔߊߦߌ ߘߌ߫ ߸ ߟߊ߬ߓߊ߲߬ ߦߌ߬ߟߊ߬ ߖߎ߯ ߟߴߏ߬ ߘߌ߫ ߞߟߋ߫.
(10) ߊߟߊ߫ ߓߘߊ߫ ߛߊ߲߬ߘߊ ߟߊ߫ ߓߊ߲߬ߓߊ߮ ߟߎ߬ ߦߋ߫ ߸ ߞߊ߬ ߓߍ߲߬ ߣߎ߯ߤߎ߲߫ ߡߏ߬ߛߏ ߣߌ߫ ߟߎ߯ߕߌ߫ ߡߏ߬ߛߏ ߡߊ߬ ، ߏ ߝߌ߬ߟߊ ߟߋ߫ ߕߘߍ߬ ߖߐ߲߬ ߝߌ߬ߟߊ߬ ߛߟߊ߫ ߟߊ߫ ߸ ߣߊߟߌ߬ߡߎ߲߫ ߒ߬ ߠߊ߫ ߖߐ߲߬ ߢߌߡߊ߫ ߝߌ߬ߟߊ߬ ߘߌ߫ ، ߏ߬ ߟߎ߫ ߞߵߊ߬ߟߎ߫ ߗߍ߬ ߟߎ߫ ߖߊ߲߬ߝߊ߫ ، ߓߊ߬ߙߌ߬ ߏ߬ ߟߎ߬ ߡߴߊ߬ߟߎ߬ ߕߟߊ߫ ߝߏߦߌ߬ ߟߴߊߟߊ߫ ߓߘߊ ، ߊ߬ ߝߐ߫ ߘߴߏ߬ ߝߌ߬ߟߊ ߡߊ߬ ߏ߬ ߟߋ ߘߐ߫ ߸ ߞߏ߫ ߊߟߎ߫ ߘߏ߲߬ ߕߊ ߘߐ߫ ߘߏ߲߬ߓߊ߮ ߟߎ߫ ߝߍ߬.
(11) ߊߟߊ߫ ߓߘߊ߫ ߛߊ߲߬ߘߊ ߟߊ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ( ߝߣߊ߫ ) ߦߋ߫ ߸ ߞߵߊ߬ ߓߍ߲߬ ߝߋߙߊߥߎ߲߫ ߡߏ߬ߛߏ ߡߊ߬ ߸ ߏ߬ ߟߋ ߞߵߊ߬ ߝߐ߫ ߞߏ߫ ߒ ߡߊ߰ߙߌ ߸ ߓߏ߲ ߘߏ߫ ߟߐ߬ ߒ ߧߋ߫ ߌ ߓߘߊ ( ߡߍ߲ߘߌߦߊ ) ߣߊߞߐ ߘߐ߫ ، ߌ ߦߋ߫ ߒ ߠߊߞߛߌ߫ ߝߋߙߊߥߎ߲߫ ߣߴߊ߬ ߗߋߥߊߟߌ ߡߊ߬ ߸ ߊ߬ ߣߴߌ ߦߋ߫ ߒ ߠߊߞߛߌ߫ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߫ ߡߊ߬.
(12) ߊ߬ ߣߌ߫ ( ߞߊ߬ ߛߊ߲߬ߘߊ ߓߍ߲߬ ) ߌߡߎ߬ߙߊ߲߬ ߘߋ߲ߡߛߏ߫ ߡߊߙߌߦߡߊ߫ ߝߣߊ߫ ߡߊ߬ ߸ ߏ߬ ߡߍ߲ ߞߵߊ߬ ߟߊ߫ ߞߊߓߊ߲ߦߊ ߟߊߛߐ߲߫ ، ߏ߬ ߞߍ ߊ߲ ߞߊ߬ ߒ߬ ߠߊ߫ ߛߟߐߡߌ߲ ߟߐ߬ ߝߍߟߌ ߞߍ߫ ߟߴߊ߬ ߘߐ߫ ( ߞߵߏ߬ ߞߍ߫ ߘߋ߲ ߘߌ߫ ) ، ߊ߬ߟߋ߬ ( ߡߏ߬ߛߏ ) ߘߏ߲߬ ߞߵߊ߬ ߡߊ߰ߙߌ ߟߊ߫ ߞߎߡߊ ߟߎ߬ ߣߴߊ߬ ߟߊ߫ ߟߍߙߊ ߟߎ߬ ߟߊߛߙߋߦߊ߫ ߸ ߊ߬ ߣߴߊ߬ ߞߍ߫ ߘߊ߫ ߖߘߍ߬ߞߟߏ߬ߦߊ߬ߓߊ߮ ߟߎ߬ ߘߏ߫ ߘߌ߫.